მეწარმეობა ბევრისთვის დაკავშირებულია მუდმივ შრომასთან, უძილო ღამეებთან, გამოწვევებთან, მათ გადალახვასთან. ბევრს ჰგონია, რომ წარმატება მხოლოდ მაშინ მოდის, როცა საკუთარ თავს მთლიანად საქმეს უძღვნი და ერთ დღესაც კი თუ გაჩერდები, ბიზნესი საფრთხეში აღმოჩნდება.  რეალობა ისაა, რომ ზედმეტი გადაღლა და მუდმივი სტრესი პირად ცხოვრებასაც აზიანებს და არც ბიზნესისთვის მოაქვს ხეირი.

ბიზნესის მდგრადი ზრდისა და ხარისხიანი შედეგების საფუძველი საქმესა და დასვენებას შორის ბალანსია. თუ ეს ბალანსი დარღვეულია, ან თუ საერთოდ არ არსებობს, გრძელვადიანი წარმატება რთულად მისაღწევი ხდება.

ფაქტია, მეწარმეს, განსაკუთრებით კი თუ მცირე ბიზნესზე ვსაუბრობთ, თავად უხდება ძალიან ბევრი რამის კეთება. მუდმივი დატვირთვის ფონზე გადაწვის, საფრთხე მაღალია და ის, რაც თავდაპირველად ძლიერი მოტივაციით დაიწყო (იდეა, საქმე), შეიძლება ემოციურ და ფიზიკურ გადაღლაში (Bornout) გადაიზარდოს.

ეს მხოლოდ ჯანმრთელობას კი არა, ბიზნესსაც აზიანებს. გადაღლილ გონებას უჭირს სწორი გადაწყვეტილებების მიღება, მცირდება კრეატიულობა, გუნდის მართვაში ჩნდება სირთულეები. შედეგად კი პროგრესის ნაცვლად, ვიღებთ რეგრესს.

კიდევ რა მოაქვს გადაღლილობას ,,ბონუსად”?

• მატულობს სტრესი
• თავს იჩენს ჯანმრთელობის პრობლემები
• ჩნდება ძილის დარღვევები
• იკლებს პროდუქტიულობა
• იზრდება შეცდომების დაშვების რისკი
• აღარ ჩნდება ახალი იდეები

ეს არ არის სრული ჩამონათვალი, თუმცა ალბათ საკმარისია იმისთვის, რომ დაფიქრდეთ, თქვენ სად ხართ?  კმაყოფილი ხართ თქვენი ცხოვრებით?  არის მასში ბალანსი?

არაერთი მეწარმისგან მსმენია, სად მაქვს დასვენებისა და ჩემს თავზე ფიქრის დრო, ყველაფერი ხომ ჩემი გასაკეთებელიაო… თუმცა, ალბათ კიდევ უფრო ღრმად თუ გავიაზრებთ, რომ პროდუქტიული სწორედ მაშინ ვართ, როდესაც ჩვენს მენტალურ, ფიზიკურ და სულიერ ჯანმრთელობაზე ვზრუნავთ, დროს აუცილებლად გამოვნახავთ.

თუ გავიაზრებთ, რომ თვითზრუნვა ფუჭად დახარჯული დრო კი არა, საკუთარ თავში ინვესტიციაა, რაც დროის გამოყენებას უფრო მდგრადს ხდის, მაშინ აუცილებლად დავიწყებთ სვლას ბალანსისკენ, რაც თავის მხრივ სტაბილურობამდე მიგვიყვანს.

და მაინც რა არის ბალანსი?

ჩვენ ყველა ინდივიდები ვართ, სწორედ ამიტომ თოთოეულ ჩვენგანს ,,ჩვენი ბალანსი” გვაქვს, რომელსაც სადმე კი არ ვპოულობთ, ჩვენ თვითონ ვქმნით საზღვრების დაწესებით, პრიორიტეტების განსაზღვრით, დროისა და საკუთარი თავის მენეჯმენტით, სხვადასხვა გადაწყვეტილებებითა და არჩევანის გაკეთებით.

როგორ შევქმნათ და შევინარჩუნოთ ბალანსი?

ამისთვის პირველ რიგში გვახსოვდეს:

• დრო განსაზღვრულია და დღე-ღამეში ყველასთვის 24 საათია
• ცარიელი ჭიქიდან წყალს ვერ დაასხავ, თუ შენ დაცლილი ხარ, სხვას ვერ გაუნაწილებ ენერგიას
• ნებისმიერი რამის გაკეთება შეგიძლია, მაგრამ ყველაფრის ერთდროულად – არა
• ვერასდროს იქნები ბოლომდე ბედნიერი საქმით, თუ შენი ცხოვრებით კმაყოფილი არ ხარ

და მაინც რას ნიშნავს შენთვის საქმესა და ცხოვრებას შორის ბალანსი? რა შემთხვევაში ამბობ რომ ბალანსი დაცულია? მე აქ სამოტივაციო სპიკერს, ბიზნესმენს, ცნობილ ავტორს, სტივენ კოუვის მოვიშველიებ და ვიტყვი -„მთავარი დროის დახარჯვა კი არა, მისი ინვესტირებაა.“ აქვე იმასაც ვიტყვი, ეს უბრალოდ Work Life ბალანსი კი არა, მთელი ცხოვრების ბალანსია, ცხოვრების, რომელიც გარდა საქმისა სხვა ბევრ სფეროს მოიცავს და ბალანსის ხელოვნება ზუსტად იმაში მდგომარეობს, ჩვენი დრო ჩვენთვისვე სწორად გადავანაწილოთ ამ სფეროებს შორის.

აქვე გიზიარებთ რჩევებს, რაც თქვენი საკუთარი ბალანსის მიღწევაში დაგეხმარებათ:

• დაგეგმე დრო საკუთარი თავისთვის – კალენდარში გაწერე არა მხოლოდ საქმიანი, არამედ პირადი შეხვედრებიც
• ისწავლე „არა“- ს თქმა – ყველა შესაძლებლობა შენთვის არ არის

• დააწესე საზღვრები – სამუშაო საათები არ უნდა მოიცავდეს 24/7-ს

• გააკეთე მცირე პაუზები – 10-15 წუთიანი (სეირნობა, სუნთქვითი ვარჯიში ან სხვა რამ, ის რაც შენს ,,ბატარეას” დამუხტავს) დღეში რამდენჯერმე

• დანერგე ,,მცირე რიტუალები” – დილის ყავა, საღამოს მედიტაცია, კვირის ოჯახური საღამოები
• ჩართე გუნდი პროცესში – დელეგირება ენერგიას დაზოგავს და ნდობას აამაღლებს
• შენთვის დაიტოვე ერთი თავისუფალი დღე კვირაში – გამოეთიშე საქმეს და აკეთე ის, რაც შენ სიამოვნებას განიჭებს

• გამოიმუშავე ჯანსაღი ჩვევები – მაგ. სპორტი, სწორი კვება და რეგულარული ძილი
• შეაფასე არა მხოლოდ შედეგები, არამედ გზა – ბიზნესში წარმატება მხოლოდ მოგება არ არის. შენი შინაგანი მდგომარეობა, ურთიერთობები და ბედნიერებაც წარმატების ნაწილია.

„ყველაზე მნიშვნელოვანი ის არის, რომ ცხოვრებით დატკბე! იყო ბედნიერი – მხოლოდ ეს არის მნიშვნელოვანი.“ – ოდრი ჰეპბერნი

მთავარია, ვიპოვოთ ჩვენი ბედნიერების წყარო და მიუხედავად იმისა, რომ ათასი პასუხისმგებლობა გვაკისრია, მითუმეტეს სამეწარმეო საქმეში, მივცეთ თავს უფლება ხშირად დავლიოთ წყალი ამ წყაროდან. ვიყოთ ენერგიით სავსე, ბედნიერი, რაც აუცილებლად შემოიტანს სტაბილურობას და მდგრადობას ბიზნესშიც.

წარმატება არ ნიშნავს მხოლოდ შრომას – წარმატება ნიშნავს პრიორიტეტებს, სწორ რიტმს, სადაც საქმესა და საკუთარ თავს თანაბარი ადგილი აქვს.

„ბალანსი ყველაფრის კეთებაში არ არის, მთავარია იცოდე, როდის უნდა გააკეთო რამე.”

ბალანსი შეგნებული არჩევანია, ის არ არის შემთხვევითობა და ეს არჩევანი შენც შეგიძლია გააკეთო!

The post ბალანსი – წარმატებული მეწარმის საიდუმლო appeared first on BPN Georgia.

The post ბალანსი – წარმატებული მეწარმის საიდუმლო appeared first on BPN Georgia.

ამ კონტექსტში, უკუკავშირმა კიდევ უფრო მნიშვნელოვანი და შეუცვლელი როლი შეიძინა.

უკუკავშირი არის ინსტრუმენტი, რომელიც ინდივიდსა თუ კომპანიას საშუალებას აძლევს გაანალიზოს აწმყო და ფოკუსირდეს მომავალზე კიდევ უფრო მეტი წარმატების მისაღწევად.

„უკუკავშირი ჩემპიონების საუზმეა“ – ამბობს კენ ბლანშარდი, ამერიკელი ბიზნეს კონსულტანტი, სამოტივაციო სპიკერი და ავტორი არაერთი წიგნისა. თქვენ, როგორ ფიქრობთ, ხართ ჩემპიონები? (თქვენს საქმეში, თქვენი კომპანიით)

მოდით ვისაუბროთ უკუკავშირზე კომპანიის კონტექსტში.

როგორ, რა ფორმითა და სიხშირით უნდა მივცეთ თანამშრომლებს უკუკავშირი?  რამდენად მნიშნელოვანია ეს მათი მოტივაციის, ჩართულობის, პროდუქტიულობისა და კმაყოფილებისათვის? ამაზე ბევრი თქმულა, ბევრიც დაწერილა, მთელი რიგი რეკომენდაციებიც არსებობს.

გრძელვადიან წარმატებაზე ორიენტირებულმა მმართველებმა, ლიდერებმა იციან უკუკავშირის მნიშველობა, ისინი მუდმივად ცდილობენ, თავადაც მიიღონ უკუკავშირი, თავადაც განვითარდნენ და ამის ფონზე კონსტრუქციული უკუკავშირის გამოყენებით სხვების განვითარებასაც შეუწყონ ხელი.(კომპანიის განვითარებასთან ერთად)

თუმცა ამჯერად კომპანიისა და მისი მომხმარებლის უკუკავშირზე მინდა გესაუბროთ…

მომხმარებლის უკუკავშირს არაერთი წარმატებული კომპანიის მმართველი ადარებს ჟანგბადს, რომელიც სასიცოცხლოდ მნიშვნელოვანია ბიზნესისთვის, როგორც ცოცხალი ორგანიზმისთვის, რომელიც სწორედ უკუკავშირით მიღებული ანალიზის შედეგადაც იზრდება, ვითარდება სწორი მიმართულებით და წარმატებასაც აღწევს.

ბიზნესის წარმატების ფორმულაზეც არაერთი მოსაზრება არსებობს, თუმცა სხვა მნიშვნელოვან ფაქტორებთან ერთად, იყო გამორჩეული, გეკავოს შენი ნიშა, იცოდე რაში მდგომარეობს შენი უპირატესობა – ის ფუნდამენტია, რაზეც წარმატებული ბიზნესი შენდება.

,,იცოდე, რას სურს შენს მომხმარებელს ყველაზე მეტად და რას აკეთებს შენი კომპანია ყველაზე უკეთ. ფოკუსირდი იმაზე, სად ხვდება ეს ორი ერთმანეთს” – ამას გვეუბნება კევინ შტირციც, ვებ მარკეტინგის ექსპერტი.

როგორ ფიქრობთ, რა დაგვეხმარება იმის გაგებაში, თუ რა სურს მომხმარებელს, ჩვენ სად ვართ ძლიერი, რაში მდგომარეობს ჩვენი უპირატესობა?

რა თქმა უნდა, დღეს ბევრი ინსტრუმენტი არსებობს, თუმცა ალბათ იმაზე უკეთესი (ზოგჯერ ყველაზე სანდო, მარტივი და ამავდროულად ხელმისაწვდომიც) ვიდრე მომხმარებლისგან მიღებული უკუკავშირია, ცოტაა.

უკუკავშირი ნანატრი საჩუქარია, თუმცა ხშირ შემთხვევაში ჩვენ ბოლომდე ვერ ვიაზრებთ მის მნიშვნელობას და არც სათანადოდ ვიყენებთ, განსაკუთრებით კი უარყოფით უკუკავშირს გავურბივართ.

თუმცა, თუ გავიხსენებთ ბილ გეითსს, რომელიც ამბობს, რომ ყველაზე უკმაყოფილო მომხმარებელი, ყველაზე დიდებული წყაროა სწავლის და გაბრაზებისა და წყრომის ნაცვლად, მადლიერნი ვიქნებით, თუ უარყოფითი უკუკავშირისაც სათანადოდ დავაფასებთ პოზიტიურთან ერთად, საკუთარ თავსაც და კომპანიასაც შესაძლებლობას მივცემთ კიდევ უფრო წინ წავიდეთ და შესაბამისად გავიზარდოთ.

საკუთარ თავს რომ მოტივაცია მივცეთ და უფრო მეტად შევიყვაროთ უკუკავშირი, (პოზიტიურთან ერთად ნეგატიურიც) გავიხსენოთ მისი სარგებელი…

რას გვაძლევს უკუკავშირი?

• კომპანიის ძლიერი და სუსტი მხარეების ანალიზი
• სერვისის/პროდუქტის მუდმივად გაუმჯობესების შანსი
• მომხმარებლის კმაყოფილების განსაზღვრა
• საბაზრო მოთხოვნილებების და მათთან ჩვენი შესაბამისობის დადგენა
• ტენდენციებისა და შანსების იდენტიფიცირება
• სტრატეგიული გადაწყვეტილების მიღებისას ორიენტირი
• სწორი ინვესტიცია კომპანიაში
• ბრენდის შენება და მისდამი ნდობის ამაღლება
• გაჯერებულ ბაზარზე კონკურენტული უპირატესობის გაზრდა
• მომხმარებლის ლოიალობისა და გაყიდვების სტიმულაცია

ამ ჩამონათვალს სხვა ფაქტორებიც შეიძლება მივამატოთ, თუმცა ალბათ ესეც საკმარისია იმისთვის, რომ კიდევ ერთხელ დავფიქრდეთ უკუკავშირის ძალასა და მნიშვნელობაზე, არასოდეს გავუშვათ შანსი ხელიდან და ნებისმიერი ფორმით მივიღოთ მომხმარებლის უკუკავშირი, რაც ერთ-ერთი მნიშვნელოვანი ორიენტირია კომპანიის წარმატების გზაზე.

“ჩვენ ყველას გვჭირდება ხალხი, ვინც მოგვცემს უკუკავშირს. ესაა გაუმჯობესების გზა” – ბილ გეითსიც ამას ამბობს.

როგორ მივიღოთ უკუკავშირი?

ამისთვის დღეს უამრავი ფორმა და მიდგომა არსებობს, საჯაროც და პერსონალურიც, ისეთები როგორიცაა მაგ.:

• გამოკითხვები/კითხვარები – მოკლე, მიზნობრივი გამოკითხვები გვეხმარება კონკრეტული ინფორმაციის შეგროვებაში.
• ინტერვიუები მომხმარებელთან – პირდაპირი საუბრები უფრო ღრმა, ხარისხობრივ უკუკავშირს გვაძლევს.
• ონლაინ ჩატი და ე.წ. საფორთთან კავშირი – მომხმარებლები რეალურ დროში გვიზიარებენ პრობლემებსა და საკუთარ წინადადებებს.
• სოციალური მედია და ონლაინ რევიუები – საჯარო უკუკავშირი გვეხმარება გავიგოთ მომხმარებელთა განწყობა.
• უკუკავშირის ფორმები მაგ. ვებგვერდზე – მარტივი და ეფექტური საშუალება ინფორმაციის შესაგროვებლად.

ამოირჩიეთ, მიაგენით თქვენთვის და თქვენი მომხმარებლისთვის სასურველსა და ეფექტურ უკუკავშირის ფორმას, მიიღეთ თითოეული უკუკავშირი(არ აქვს მნიშვნელობა პოზიტიური იქნება ის, თუ ნეგატიური) როგორც საჩუქარი და იყავით ამისთვის მადლიერი!

მთავარია, ესეც გვახსოვდეს – მომხმარებლის უკუკავშირი არ ნიშნავს მხოლოდ მიღებას/მოსმენას – ეს მოქმედებასაც ეხება და ზუსტად ეს ხდის მას მნიშვნელოვანს.

როგორ ვიმოქმედოთ?

• მოვუსმინოთ (მომხმარებელს)
• გავაანალიზოთ მოსმენილი, განვსაზღვროთ პრიორიტეტები
• მივიღოთ შესაბამისი გადაწყვეტილებები, გადავდგათ ქმედითი ნაბიჯები
• ისევ მოვუსმინოთ (მომხმარებელს)

როგორც ვხედავთ, უკუკავშირი და მასზე მუშაობა უწყვეტი ციკლია, რომელიც იწყება მოსმენით და გადადის ქმედით ნაბიჯებში, რასაც წინსვლა, პროგრესი და წარმატება მოჰყვება ხოლმე ბონუსად.

და ბოლოს თქვენ მინდა გკითხოთ – თქვენ რას მიირთმევთ საუზმედ?

ველით თქვენს უკუკავშირს!

The post რას მიირთმევენ ჩემპიონები საუზმედ?! appeared first on BPN Georgia.

The post რას მიირთმევენ ჩემპიონები საუზმედ?! appeared first on BPN Georgia.

მელიტა ლომაძე, პროფესიონალი ქორეოგრაფი, Melita Dance Studio-სა და ანსამბლ Melitassy-ს დამფუძნებელია და დღემდე თავადაც აქტიურად არის ჩართული არა მხოლოდ მართვის, არამედ სწავლების პროცესშიც. 

ქართული ცეკვა ქართულ ენასთან, მრავალხმიან სიმღერასთან ერთად ჩვენი იდენტობის ნაწილია, მისი მოფრთხილება და თაობებისთვის გადაცემა უდაოდ საპასუხისმგებლო და საამაყო საქმეა, მითუმეტეს თუ მის საზღვრებს მიღმა გატანაზე ვსაუბრობთ. ცეკვა ჩვენი კულტურისა და ისტორიის განუყოფელი ნაწილია, რომელიც, როგორც ამბობენ, ყოველ ქართველს სისხლში აქვს გამჯდარი. სწორედ ამიტომ, სასიხარულოა ის ფაქტი, რომ მსოფლიო მასშტაბით ყოვედღიურად იზრდება ქართული ცეკვისადმი ინტერესი.  მელიტა ნამდვილად არის ის ადამიანი, ვისაც დიდი წვლილი შეაქვს ჩვენი კულტურის მსოფლიოს სხვადასხვა ქვეყანამდე მიტანაში.

,,ჩემი მიზანია, მთელი მსოფლიოს მასშტაბით, რაც შეიძლება მეტ ადამიანს გავაცნო და შევაყვარო ქართული ცეკვა” – ამბობს მელიტა ლომაძე და ამას ნამდვილად ახერხებს კიდეც. გარდა იმისა, რომ საკუთარ სტუდიაში საქართველოში ჩამოსულ უცხოელებს მასტერკლასებს სთავაზობს, მსოფლიოს სხვადასხვა კუთხიდანაც ერთვებიან დაინტერესებული პირები და ონლაინ სწავლობენ მასთან ქართული ცეკვის უნიკალურ მოძრაობებს. ამას გარდა მელიტა უკვე არაერთ ქვეყანას ესტუმრა და ადილზე ჩაუტარა ქართული ცეკვის მასტერკლასი ემიგრანტებსაც და ამ ქვეყნების წარმომადგენლებსაც. საამაყოა ის ფაქტი, რომ იაპონიაში არსებობს ანსამბლი “საფირონები”, რომლებიც სწორედაც მელიტას “მოსწავლეები” არიან და მთელი გულით ასრულებენ ქართულ ცეკვებს ფესტივალებსა და სხვადასხვა კონცერტებზე.

ზაფხულის ერთ ცხელ საღამოს BPN Georgia-ელებიც ვეწვიეთ Melita Dance Studio-ს.

მელიტა დატვირთული გრაფიკის მიუხედავად უკვე რამდენიმე წელია BPN Georgia-ს პროგრამის მონაწილეცაა და ბიზნესის მართვის კუთხითაც მუდმივად ვითარდება.

მოგეხსენებათ, საჭირო და საინტერესო კავშირები ბიზნესში და არა მხოლოდ, დიდ როლს ასრულებენ. ხშირად სხვა მნიშნელოვან ფაქტორებთან ერთად ჩვენი სანაცნობო სიაც განსაზღვრავს ჩვენს წარმატებას. სწორედ ამიტომ  ძალიან მნიშვნელოვანია სათანადო დრო და ყურადღება დავუთმოთ ე.წ. “ნეთვორქინგს”. სტატისტიკუკრადაც,  ისინი, ვისაც “ნეთვორქინგის” შესაბამის ყურადღებას უთმობენ, 42%-47%-ით უფრო სწრაფად ვითარდებიან, ვიდრე ისინი, ვინც “ნეთვორქინგის” მნიშვნელობას არ აღიარებენ.  

არაფორმალურ გარემოში კიდევ უფრო ნაყოფიერი და სასიამოვნოა ეს პროცესი… საინტერესო საუბრები ჭიქა ღვინის თანხლებით, საოცარი მელიტას ქართული ცეკვის მასტერკლასი განტვირთვის საუკეთესო საშუალება და ამავდროულად ენერგიის წყაროც გახდა  BPN Georgia-ს პროგრამის სხვა მონაწილეებისთვის, რომლებმაც საინტერესო კონტაქტებიც დაამყარეს და ქართული ცეკვის ძალა, მისი მუხტიც მოკლე დროშივე შეიგრძნეს…

დიდი მადლობა მელიტას გულთბილი  მასპინძლობისთვის და ყველა BPN Georgia-ელს, ვინც ამ საღამოს ნაწილი იყო!

ვინ იქნება შემდეგი? ვის ვეწვევით შემდეგ ჯერზე BPN Georgia-ელები?!

The post როცა ბიზნესიც ცეკვავს – შეხვედრა Melita Dance Studio-ში appeared first on BPN Georgia.

The post როცა ბიზნესიც ცეკვავს – შეხვედრა Melita Dance Studio-ში appeared first on BPN Georgia.

ცხოვრება პლატო არ არის, მას აღმა და დაღმა სვლებიც სდევს თან. მშვიდი, ბედნიერი, წარმატებით სავსე დღეები, თვეები და წლებიც გვაქვს და გამოწვევებით სავსე პერიოდებიც. ზუსტად ამაში მდგომარეობს ცხოვრების ხიბლი. ადამიანის გამოწვევაა – რთულ პერიოდებშიც შეინარჩუნოს შინაგანი სიმშვიდე, მოტივაცია, იყოს სტრესგამძლე, მტკიცე და მყარად იდგეს მიწაზე.

როგორ მოვახეროთ ეს?

ზუსტად ამ საკითხს დაეთმო შეხვედრა, რომელიც BPN Georgia-ში ქართველი მეწარმეებისთვის გაიმართა  სათაურით „მოტივაცია ტურბულენტურ პერიოდში“ და მისი მიზანი იყო – მეწარმეებისთვის, როგორც ლიდერებისთვის, მიეწოდებინა ინფორმაცია, თუ როგორ შეიძლება გავაღვივოთ და გავაძლიეროთ მოტივაცია მაშინაც კი, როცა გარემოებები მარტივი არ არის.

რამდენადაც მეწარმე მხოლოდ საკუთარ თავზე არ არის პასუხისმგებელი, მის უკან უთვალავი ადამიანი დგას – ოჯახი, მისი გუნდი, მომხმარებლები, პარტნიორები, იმდენად კიდევ უფრო დიდია მისი პასუხისმგებლობა საკუთარ მოტივაციაზე. თუმცა ყველა ადამიანები ვართ და ის, რაც შეხვედრაზე იქნა განხილული, ერთნაირად სასარგებლოა არამხოლოდ მეწარმის, არამედ ნებისმიერი ადამიანისთვის.

შეხვედრას BPN Georgia-ს შვეიცარიელი დირექტორი, ტრენერი და ბიზნეს კონსულტანტი, დანიელი მათერი უძღვებოდა, რომელმაც დამსწრეებს პრაქტიკული მიდგომები და მარტივი, მაგრამ ეფექტური ინსტრუმენტები გაუზიარა ისეთი პერიოდებისთვის, როდესაც ჩვენს ირგვლივ ყველაფერი ისე არ ხდება, როგორც გვინდა ან წარმოგვედგინა, ისაუბრა იმაზე, თუ როგორ უნდა შევინარჩუნოთ ასეთ პერიოდებში მოტივაცია და შესაბამისად სტაბილურობა საქმესა და მის მიღმა ცხოვრებაშიც.

სხვა ბევრ საინტერესო თემასთან ერთად მასტერკლასის საკვანძო საკითხები იყო:

• ფოკუსირება კონტროლირებადზე. ენერგია უნდა მივმართოთ იმ აქტივობებზე, რომლებზეც რეალურად გვაქვს გავლენა.
• შტურმებში შანსების ძიებაზე. ყველა გამოწვევაში შესაძლებლობაა ჩამალული, თუ ჩვენ ამ მიდგომით შევხედავთ მოვლენებს, რთული პერიოდები სხვა მნიშვნელობას შეიძენენ.
• რეალისტური მიზნების დასახვა, მათი დაყოფა პატარა ნაბიჯებად, რაც ერთის მხრივ გვიცავს გადაწვისგან და მეორე მხრივ ხელს უწყობს მოტივაციის შენარჩუნებას.
• შენი „რატომ“- ის გაცნობიერება-გამორკვევა. ხედვის ქონა, საზრისის პოვნა იმაში, რასაც ვაკეთებთ, რაც გვაძლევს საშუალებას მივიდეთ Flow მდგომარეობამდე, რაც ამყარებს შინაგან მოტივაციას, რომელიც თავის მხრივ მდგრადობის წყაროა.
• პრაქტიკული ჩვევები ყოველდღიურობაში. დისციპლინა საკუთარ ცხოვრებაში, რასაც კმაყოფილებამდე, საკუთარი თავის რწმენამდე და სასურველ შედეგამდეც მივყავართ.

წარმატება არ არის შემთხვევითობა, მითუმეტეს თუ ტურბულენტურ დროზე ვსაუბრობთ – ეს შედეგია მიზანდასახული, გააზრებული, დისციპლინირებული მოქმედებისა და შინაგანი მოტივაციის. მცირე ნაბიჯებს და კარგად გააზრებულ, განმეორებად აქტივობებს მივყავართ იმ შედეგამდე, რომელიც ჩვენს მოტივაციასაც უწყობს ხელს და გუნდის მოტივაციის წყაროც ხდება, რაც  თავის მხრივ ბიზნესის მდგრადი განვითარების წინაპირობაა.

გახსოვდეს: “ყველაფერი შეგიძლია წაართვა ადამიანს გარდა იმ არჩევანისა, ჰქონდეს საკუთარი დამოკიდებულება გარემოებების მიუხედავად.”- ვიქტორ ფრანკლი

აქვე ჰკითხე საკუთარ თავს, შენ რისი შეცვლა შეგიძლია და დაიწყე დღესვე პატარა ნაბიჯით!

The post მოტივაცია ტურბულენტურ პერიოდში – BPN Georgia-ს მასტერკლასი მეწარმეებისთვის appeared first on BPN Georgia.

The post მოტივაცია ტურბულენტურ პერიოდში – BPN Georgia-ს მასტერკლასი მეწარმეებისთვის appeared first on BPN Georgia.

ღონისძიება შვეიცარიის საელჩომ გახსნა. საელჩოს წარმომადგენლის გამოსვლაში მკაფიოდ გაესვა ხაზი კერძო სექტორის სასიცოცხლო მნიშვნელობას, როგორც ეკონომიკური განვითარების, სამუშაო ადგილების შექმნის, შემოსავლის გენერირებისა და სოციალური ჩართულობის ქვაკუთხედს.

საუბარი შეეხო, ასევე გამოცდილების გაზიარებისა და ზოგადად, ისეთი შესაძლებლობების მნიშვნელობას, როგორიც ეს შეხვედრა იყო. ასეთი შეხვედრების/პლატფორმების მიზანია, კერძო სექტორის დაინტერესებულ მხარეებთან ეფექტიანი თანამშრომლობის გზით, ხელი შეუწყოს მდგრადი და ინკლუზიური ზრდისათვის საერთო ხედვის ჩამოყალიბებას.

Swisscontact-ის საქართველოს ოფისის ხელმძღვანელმა, რიჩარდ როუზმა, თავის გამოსვლაში ქართული მცირე და საშუალო საწარმოებისთვის ხელმისაწვდომი ბიზნეს სერვისების ეკოსისტემის გაძლიერების მნიშვნელობაზე ისაუბრა, შეეხო ასევე იმას, თუ როგორ უჭერს მხარს Swisscontact-ი ადგილობრივ პარტნიორებს ამ მნიშვნელოვანი საქმეში.

BPN Georgia-ს საქმიანობაზე დაყრდნობით, რომელსაც ინდივიდუალური ბიზნეს ქოუჩინგის დიდი გამოცდილება აქვს ქართულ კონტექსტში, მისმა შვეეიცარიელმა ხელმძღვანელმა, დანიელ მათერმა, პრაქტიკული ინფორმაცია მიაწოდა დამსწრე საზოგადოებას ბიზნეს ქოუჩინგისა და საკონსულტაციო გავლენასთან დაკავშირებით. მან ისაუბრა იმაზე, თუ რა შესაძლებლობები და გამოწვევები ახლავს მცირე და საშუალო საწარმოების ქოუჩინგის პროცესს ქართულ რეალობაში. დამსწრე მეწარმეებსა და სხვა ორგანიზაციების წარმომადგენლებს ბატონმა დანიელმა ასევე გაუზიარა ის შესაძლებლობები და ბენეფიტები, რასაც ქართველი   BPN Georgia-ს მეწარმეთა მხარდაჭერის პროგრამის ფარგლებში ინდივიდუალური მხარდაჭერის შეთხვევაში ღებულობენ.

ღონისძიება დასრულდა ე. წ. ნეთვორქინგით, სადაც ბანკების, ბიზნეს სერვისების მიმწოდებელი სხვადასხვა ორგანიზაციებისა და ქართული მცირე და საშუალო საწარმოების წარმომადგენლებს, BPN Georgia-ს პროგრამის მონაწილეებს კონსტრუქციული დიალოგის, ერთმანეთში ინფორმაციის გაცვლის, საჭირო კავშირების დამყარების ან გაღრმავების ძალიან კარგი შესაძლებლობა ჰქონდათ.

BPN Georgia საკუთარი პროგრამის ფარგლებში აგრძელებს ადგილობრივი მეწარმეების მხარდჭერას, ჩვენ  მზად ვართ გავაძლიეროთ პარტნიორული ურთიერთობები და ამით კიდევ უფრო ფართოდ გავუხსნათ კარი ახალ შესაძლებლობებს საქართველოს სამეწარმეო ეკოსისტემის მხარდასაჭერად.

The post შვეიცარიის საელჩო, Swisscontact-ი და BPN Georgia – გამოცდილებას გვიზიარებენ appeared first on BPN Georgia.

The post შვეიცარიის საელჩო, Swisscontact-ი და BPN Georgia – გამოცდილებას გვიზიარებენ appeared first on BPN Georgia.

BPN Georgia სწორედ ამ ურთიერთთანამშრომლობის, თანადგომის, ერთმანეთისთვის ცოდნა-გამოცდილების გაზიარების მხარდამჭერია. სწორედ ამას ემსახურება ის შეხვედრებიც, რომლებიც ჩვენს სივრცეში ხშირად იმართება და სადაც BPN Georgia-ს მონაწილეებს საშუალება აქვთ საკუთარი მაგალითით ბიზნესის კიდევ უფრო წარმატებით მართვის ახალი ინსტრუმენტები გაუზიარონ ერთმანეთს.

მორიგი შეხვერდა გაყიდვების თემას დაეთმო. BPN Georgia-ს პროგრამის წარმატებულმა და აქტიურმა მონაწილემ, გიორგი სრესელმა, რომელიც საქართველოში კომპანია Vinove-სა და Little trees ოფიციალური წარმომადგენელი და ecowood-ის გაყიდვების მენეჯერი გახლავთ, საკუთარი მრავალწლიანი გამოცდილება გაუზიარა აუდიტორიას.

მსმენელებისთვის კიდევ ერთხელ ცხადი გახდა, რამდენად მნიშვნელოვანია კომპანიისთვის საწყის ეტაპზევე შეიმუშაოს კონცეფცია, რომელსაც ის ერთგულად გაყვება თავისი სტრატეგიული განვითარების პროცესში და რომ გაყიდვებიც, როგორც სხვა დანარჩენი ასპექტები, სწორედ ამ კონცეფციასთან შესაბამისობაში უნდა იქნას დაგეგმილი.

გიორგიმ შეხვედრის ფარგლებში კონკრეტული ბიზნესის, ecowood-ის, განვითარების მაგალითზე აჩვენა რა ფაქტორებს უნდა მივაქციოთ ყურადღება. ისაუბრა იმაზე, თუ რამდენად მნიშვნელოვანია, ისევე როგორც მთლიანობაში ბიზნესი, უშუალოდ გაყიდვების პროცესიც სრულად მომხმარებელზე იყოს ორიენტირებული. გიორგიმ მკაფიოდ გაუსვა ხაზი შემდეგ კონკრეტულ საკითხებს, რომლებიც ეფექტური გაყიდვების განუყოფელი ნაწილია:

– პოტენციური მომხმარებლის იდენტიფიკაცია და შეფასება

– შეხვედრისთვის მომზადება

– შეხვედრა

– პრეზენტაცია

– გაყიდვის დასრულება

– გაყიდვის შემდგომი კავშირი

პრობლემურ მომხმარებელთან ურთიერთობა, არსებულ მომხმარებელზე ზრუნვა, ახალ მომხმარებელზე გასვლა, მომხმარებელთა ბაზების ანალიზი და კიდევ არაერთი საინტერესო საკითხი იქნა წამოწეული შეხვედრაზე, რომელიც კიდევ ერთი დასტური იყო იმის, რომ ერთად ვქმნით ძალას, რომელსაც მასშტაბური ცვლილებების მოხდენა შეუძლია, ძალას, რომელიც ბევრი დიდი წარმატების გარანტად იქცევა.

„მარტო სიმფონიას ვერ დაუკრავ, ამისთვის მთელი ორკესტრია საჭირო“-ჰ. ე. ლუკოკი

ჩვენ შეგვიძლია ვიყოთ ორკესტრი!

BPN Georgia ერთად ძლიერი მეწარმეობისთვის საქართველოში!

The post BPN Georgia-ელები ერთმანეთის მხარდასაჭერად appeared first on BPN Georgia.

The post BPN Georgia-ელები ერთმანეთის მხარდასაჭერად appeared first on BPN Georgia.

1 დღე:
პირველ ნაწილში თქვენ შეისწავლით ბიზნეს გეგმის შედგენის ძირითად პრინციპებს, გაიაზრებთ და სტრუქტურას მისცემთ თქვენს იდეებს, ნათლად დაინახავთ თქვენი ბიზნესის ძლიერ და სუსტ მხარეებს, შანსებსა და რისკებს, შეიმუშავებთ სტრატეგიას, დაისახავთ კონკრეტულ მიზნებს თქვენი საქმიანობის განვითარებისათვის და შეადგენთ მასზე მორგებულ ბიზნეს გეგმას. თქვენ ასევე გააცნობიერებთ, რაზე უნდა გააკეთოთ აქცენტი კომუნიკაციისას, რას აქცევენ თქვენი პოტენციური დამფინანსებლები განსაკუთრებულ ყურადღებას და როგორ უნდა მოახერხოთ  ლაკონური და მომხმარებელზე ორიენტირებული პრეზენტაციით თქვენი ბიზნეს იდეის  დამაჯერებლად წარდგენა.

განსახილველი თემები:

• კომპანიის ხედვა: რა მიმართულებით უნდა განვითარდეს კომპანია მომავალში
• გაყიდვის უნიკალური შეთავაზება (USP): როგორ უნდა დაარწმუნოთ პოტენციური მომხმარებლები თქვენი პროდუქტის მაღალ ღირებულებასა და უპირატესობაში. რა განგასხვავებთ კონკურენტისგან
• ბაზრის ანალიზი: ერთმნიშვნელოვანი სამიზნე სეგმენტის განსაზღვრა და მათთან კავშირის დამყარება ინდივიდუალურად მორგებული არხებით და ინსტრუმენტებით. სწორი საკომუნიკაციო ენის და ფორმების შერჩევა
• SWOT ანალიზი: ძლიერ მხარეებზე კონცენტრირება და სუსტი მხარეების დაბალანსება, შანსების გამოყენება და რისკების ამოცნობა
• კონკურენტების ანალიზი
• ბიზნესის განვითარებისთვის აუცილებელი სტრატეგიული ნაბიჯების დაგეგმვა და მათი დროში გაწერა (Gantt Chart)
• პროდუქტის ხარისხი: მომხმარებლის მოთხოვნების და მოლოდინების ანალიზი. როგორ უზრუნველვყოთ პროდუქტების და მომსახურების ხარისხი
• რისკების მართვის გეგმა, მათი შეფასება და პრევენციის ღონისძიებები

ბიზნეს გეგმის ნიმუში

მეორე ნაწილში თქვენ წარმოდგენას შეიქმნით ფინანსური მენეჯმენტის ძირითად პრინციპებზე მცირე და საშუალო ბიზნეს სექტორში, რაც დაგეხმარებათ თქვენი საქმიანობის ფინანსური მდგომარეობის გააზრებაში.
თქვენ მიიღებთ ცოდნას, თუ როგორ უნდა შეადგინოთ მოგება – ზარალის უწყისი და მისი დახმარებით როგორ დაგეგმოთ ფინანსები მომდევნო ოთხი წლისთვის. ამ გეგმის დახმარებით თქვენი პროდუქტებიდან თუ მომსახურებიდან მიღებულ სავარაუდო შემოსავალს ადარებთ საოპერაციო თუ ნედლეულის/ძირითადი მასალის სავარაუდო ხარჯებს და ანალიზის საფუძველზე ხვდებით, ღირს თუ არა საქმიანობის გაგრძელება/წამოწყება. გარდა ამისა აკონტროლებთ თქვენს დებიტორულ და კრედიტორულ დავალიანებებს, სწორად აღრიცხავთ ცვეთის და სხვა მნიშვნელოვან ხარჯებს, გეგმავთ ფინანსებს, აკეთებთ ფინანსურ ანალიზს და იღებთ სწორ გადაწყვეტილებებს.

განსახილველი თემები:

• შემოსავლებისა და ხარჯების აღრიცხვა
• მოგება – ზარალის უწყისის დახმარებით საერთო და წმინდა მოგების გამოთვლა
• დებიტორ -კრედიტორების სიების წარმოება, მათი საშუალებით მომხმარებლებისა და მომწოდებლების პოზიციების განსაზღვრა და კონტროლი
• ცვეთის ხარჯების გამოთვლა
• რეზერვის არსის განსაზღვრა.

The post ჩემი ბიზნეს გეგმა – წარმატების გასაღები appeared first on BPN Georgia.

The post ჩემი ბიზნეს გეგმა – წარმატების გასაღები appeared first on BPN Georgia.

The post მეგი მაისურაძე appeared first on BPN Georgia.

„ცალ – ცალკე თითოეული წვეთი ვართ, ერთად კი ზღვა.“ – ამბობს რიუნოსუკე სატორო, იაპონელი ავტორი. ამას ყველა კომპანიის მმართველი უნდა იაზრებდეს და ძალისხმევას არ იშურებდეს საკუთარი საქმისთვის სასურველი კადრების შერჩევის სწორი მექანიზმის შემუშავებაში.

სწორედ აქ იწყება პროცესი, რომელსაც მივყავართ კომპანიის გუნდთან, რაც, შეიძლება ითქვას, უმნიშვნელოვანესი კაპიტალია ნებისმიერი ბიზნესისთვის. არ აქვს მნიშვნელობა, რამდენად ინოვაციურია შენი იდეა, გაქვს თუ არა ფინანსური რესურსი ეს იდეა რეალობად რომ აქციო,  თუ შენს გარშემო საჭირო და კვალიფიციურ ადამიანებს არ შემოიკრებ, ძალიან რთული, შეუძლებელიც კი იქნება მდგრად, გრძელვადიან ჭრილში წარმატებულ საქმიანობაზე იფიქრო.

მნიშვნელობა არ აქვს  სტარტაპი ხარ,  პირველ თანამშრომელს ახლა არჩევ, თუ უკვე შემდგარ ბიზნესს მართავ და განვითარება-რეორგანიზაციის პროცესში გუნდში დამატებითი ძალა გჭირდება, სასურველი კადრის შერჩევა ერთნაირად საპასუხისმგებლო პროცესია და რამდენადაც მნიშვნელოვანია, იმდენად კომპლექსური  და რთულია მისი ეფექტიანად განხორციელება.

თუმცა, თუ საკუთარ ან სხვების გამოცდილებას გავითვალისწინებთ, ამ სფეროს ექსპერტების რჩევებსაც მივიღებთ, სწორად განვსაზღვრავთ პროცესს და კარგად გავიაზრებთ ვინ და რა შედეგების მისაღებად გვჭირდება, უფრო რეალურია, დასაქმებისა და ტალანტების მაღალკონკურენტულ ბაზარზე ჩვენთვის სასურველი კადრი ვიპოვოთ.

რატომ დგას მუდმივად  ძალიან ბევრ კომპანიაში თანამშრომლების მოტივაციის პრობლემა?! სხვადასხვა სემინარებით, თიმბილდინგით, ბონუსებით, წამახალისებელი აქტივობებით დამსაქმებელი ცდილობს თანამშრომლის მოტივაციის ამაღლებას ან შენარჩუნებას. თუ გიფიქრიათ იმაზე, რომ რაღაცას შეიძლება არასწორად აკეთებთ?! ბევრი ფაქტორია, რომელიც უნდა გამოვრიცხოთ დემოტივაციის ან დაბალი მოტივაციის მიზეზების დასადგენად, თუმცა ალბათ პირველი შეკითხვა, რომელიც საკუთარ თავს უნდა დავუსვათ, მაინც შემდეგში მდგომარეობს – სწორი კადრი შევარჩიე კონკრეტულ პოზიციაზე?

„8 საათი რომ მქონდეს ხის მოსაჭრელად, 6 საათი ნაჯახს გავლესავდი“. – ეს ციტატა აბრაამ ლინკოლს ეკუთვნის, ჩვენს თემასაც ეხმიანება და იმას უსვამს ხაზს, რომ გუნდის ფორმირებაში, კადრების შერჩევასა და რეკრუტინგში ჩადებული დრო და ენერგია ნამდვილად სწორი ინვესტიციაა. უკუგება მაღალია, თუ ამ პროცესს სწორად წარვმართავთ.
გაგიზიარებთ რამდენიმე რჩევას, რომელიც  დაგეხმარებათ, სასურველი კადრის შერჩევის პროცესი ეფექტურად განახორციელოთ.

პირველ რიგში განსაზღვრეთ:

• ვინ გჭირდებათ (პირადი ასისტენტი, გაყიდვების აგენტი, სოც.მედია მენეჯერი, ფინანსისტი, თუ …)?
•  რის შეთავაზება შეგიძლიათ კანდიდატისთვის?
• შეძლებთ მარტო  გაუმკლავდეთ ამ პროცესს, თუ დახმარება გჭირდებათ (გუნდის შიგნით ან გარე მესამე პირისგან)

მას შემდეგ რაც ზუსტად განსაზღვრავთ ზემოთ ჩამოთვლილ პუნქტებს, დაფიქრდით იმაზე:

• რა უნარები, ცოდნა და კომპეტენციაა საჭირო იმ ფუნქცია-მოვალეობის შესასრულებლად, რომელსაც ეს პოზიცია ითვალისწინებს;
• რა პრაქტიკული გამოცდილება დაეხმარება სასურველ კანდიდატს დაკისრებული როლის ეფექტურად შესრულებაში;
• რა პიროვნული თვისებებია საჭირო;
• ზუსტად განსაზღვრეთ კრიტერიუმები(რაც უფრო კონკრეტული იქნება, მით უკეთესი);
• გაწერეთ ე. წ. სამუშაოს აღწერილობა (job discription);
• დაფიქრდით, სად შეიძლება ასეთი კანდიდატი მოიძიოთ, განსაზღვრეთ ინფორმაციის გავრცელებისა და განთავსების არეალი (სანაცნობო წრე, საძიებო პორტალები, LinkedIn, Facebook  და სხვა);
•  მოემზადეთ შესაბამისად (რელევანტური კითხვები, ტესტი და სხვა ინსტრუმენტები, რითაც შეაფასებთ კომპეტენციას, მოტივაციას, განსაზღვრავთ ფსიქოტიპს, რაც გუნდისთვის ასევე უმნიშვნელოვანესია);
• დაგეგმეთ, როგორი იქნება: პირისპირ შეხვედრა, ინტერვიუ, ტესტი და ა.შ.;
• მოისმინეთ და კარგად გაიაზრეთ კანდიდატის მოლოდინები (რამდენად თანხვედრაშია ის თქვენს მოლოდინებთან);
• წინასწარ გაწერეთ გადაწყვეტილების მიღების პროცესიც (შეფასების კრიტერიუმები, ვადები, უკუკავშირს როგორ აწვდით კანდიდატს);

ამ პროცესში ერთი დიდი ხაფანგი არსებობს, რომელშიც ნებისმიერი ჩვენგანი შეიძლება აღმოჩნდეს: კანდიდატის სუბიექტური შეხედულებით არჩევა (შენი მსგავსი ადამიანის შერჩევა). ადამიანურია, დადებითად განეწყო მის მიმართ, ვისაც მაგალითად შენსავით იტაცებს ლაშქრობა, შენსავით უყვარს ფეხბურთი, შენი მშობლიური ქალაქიდან არის, ან თუნდაც ისეთი უნარები გააჩნია, რომლებიც შენზე სუბიექტურად დიდ შთაბეჭდილებას ახდენს, მაგრამ კონკრეტული სამუშაოს შესრულებასთან არავითარ კავშირში არ არის და სარგებელს არ წარმოადგენს შენთვის. თუ მუდმივად გვემახსოვრება, რომ სუბიექტურმა და ემოციურმა გადაწყვეტილებამ შეიძლება თქვენი კომპანია დააზარალოს, მაშინ მარტივია, თავიდან ავირიდოთ ის.

გახსოვდეთ, თქვენი ბიზნეს სტრატეგიის ეფექტიანად განხორციელების საქმეში, უმნიშვნელოვანესი რგოლი სწორედ თქვენი თანამშრომელია!
წარმატებებს გისურვებთ გუნდის ფორმირების საპასუხისმგებლო  პროცესში!

The post წარმატება იწყება აქ… appeared first on BPN Georgia.

The post წარმატება იწყება აქ… appeared first on BPN Georgia.

ორგანიზაციულ კულტურაზე ბევრი დაწერილა, ბევრი განმარტება არსებობს და მიუხედავად ამისა ხშირად ისმის კითხვა – მაინც რა არის ორგანიზაციული კულტურა?

ორგანიზაციული კულტურის არაერთი ფორმა არსებობს, თუმცა ყველა მათგანს აერთიანებს ის, რომ ამ ცნების ქვეშ მოიაზრება კომპანიის ღირებულებები, ნორმები, ქცევის ფორმები, რაც ასახავს ორგანიზაციის ყოველდღიურობას, გარემოს, განსაზღვრავს იმას, თუ როგორ ხდება მაგ. გადაწყვეტილების მიღება, უკუკავშირის გაზიარება, კომუნიკაციის რა ფორმაა მისაღები, შეცდომასა და კონფლიქტზე როგორია რეაქცია, როგორ გრძნობენ თავს ამ კომპანიაში დასაქმებული ადამიანები, რამდენად მაღალია მათი ჩართულობა, აიდენტიფიცირებენ ისინი თავს  კომპანიასთან თუ არა და ა.შ.

«ორგანიზაციული კულტურა არის ფასეულობების და რიტუალების ერთობლიობა, რომელიც ორგანიზაციის წევრებს შორის ინტეგრაციის პროცესში «წებოს» როლს ასრულებს» – რიჩარდ პერინი.

ისევე როგორც თითოეული ადამიანი, ყოველი კომპანიაც ცალკეული ინდივიადია, აქვს საკუთარი ხასიათი, წესები, ქცევის განსაკუთრებული ფორმები და განსხვავდება სხვა ორგანიზაციებისგან. დღეს, როდესაც ბაზარი უთვალავი საინტერესო ბიზნესით არის გაჯერებული, ხშირად სწორედ ორგანიზაციული კულტურაა ის ფაქტორი, რაც ბიზნესის გრძელვადიანი სიცოცხლისუნარიანობის, წინსვლისა და წარმატების წინაპირობა ხდება.

როგორც სპიკერი და ანტრეპრენერი, VaynerX-ის დამფუძნებელი, გარი ვაინერჩუკი ამბობს: «კორპორატიული კულტურა არის ყველა წარმატებული კომპანიის ხერხემალი.»
და მაინც სად ვხვდებით ორგანიზაციულ კულტურას კომპანიაში?
ორგანიზაციული კულტურა ფორმალური და არაფორმალური სახით არსებობს ორგანიზაციებში. ფორმალურად გაწერილ კულტურას კომპანიის მისიაში, ხედვაში, ქცევის კოდექსში, გაიდლაინებში ვნახავთ, მაგრამ ძლიერი და ქმედითი ორგანიზაციული კულტურის შესაქმნელად ეს საკმარისი არ არის. ამისთვის საჭიროა, დაინერგოს არაფორმალური წესები, რომლებიც იდეალურ შემთხვევაში ფორმალურ წესებთან (ხედვასა და ღირებულებებთან) თანხვედრაში მოდიან. ასეთი წესები კომპანიის შიგნით ყოველდღიურ რეჟიმში ვლინდება მაგ. კომუნიკაციის ფორმებში. გადამწყვეტად მნიშვნელოვანია,  ორგანიზაციული კულტურის ორივე ნაწილი კომპანიაში დასაქმებული ყველა ადამიანისთვის იყოს ცნობილი და გუნდის თითოეული წევრი ამ წესებით მოქმედებდეს. ეს განსაკუთრებით მმართველ რგოლს ეხება, სწორედ კომპანიის დირექტორი, მენეჯერი, დამფუძნებელი (თუ ის პირადად არის ჩართული მართვაში) უნდა ცხოვრობდნენ ამ ნორმებით.

მნიშვნელოვანია, მმართველ-დირექტორს, დამფუძნებელს (კომპანიის მასშტაბს მნიშვნელობა არ აქვს) კარგად ჰქონდეს გააზრებული ორგანიზაციული კულტურის არსი და ის ფაქტი, რომ სწორედ ის აწესებს სტანდარტს. (რა თქმა უნდა, თანამშრომლის ფაქტორი გათვალისწინებულია და მხოლოდ ვერტიკალურად არ ხდება წესების შემოტანა.) პირველ რიგში, სწორედ ხელმძღვანელია ამ წესების, კორპორატიული ნორმებისა და ღირებულებების დამცველ-გამტარებელი. საბოლოოდ ის ერთადერთია, ვის ხელშიც არის შესაძლებლობა, საკუთარი მართვის სტილით, რომელიც იდეალურ შემთხვევაში კომპანიის ფასეულობებს უნდა ეფუძნებოდეს,  ქმნის კულტურას და ხდება ინსპირაციის წყარო დანარჩენებისთვის. მას საკუთარი მაგალითით თანამშრომლამდე მიაქვს კულტურის არაფორმალური მხარე და ნორმები. ეს არის კომპანიაში ძლიერი კულტურის შექმნის ფუნდამენტი.

Zappos, Google, Twitter, Facebook, Adobe – ეს იმ კომპანიების მცირედი ჩამონათვალია, რომლებსაც ზემოთ აღნიშნული კარგად აქვთ გააზრებული და სათანადო რესურსსაც დებენ კორპორატიული კულტურის მაღალი სტანდარტის დასამკვიდრებლად.
კომპანიის შექმნა და მისი განვითარება თავის თავში გუნდის, თანამშრომლების განვითარებას და მათ ხელშეწყობას მოიაზრებს. კორპორატიული კულტურა სწორედ იმას უნდა ემსახურებოდეს, ვიპოვოთ როგორ  ამ ერთიანობაში (გუნდი) და შევქმნათ ერთი მთლიანობა, სადაც ფასეულობები ქცევაში გამყარებულია და  თანამშრომლის ბედნიერების ინდექსიც მაღალი. ასეთ შემთხვევაში ის საკუთარ ფასეულობებს კომპანიის ღირებულებებთან აკავშირებს, გუნდის მნიშვნელოვან წევრად აღიქვამს თავს და მეტ პასუხისმგებლობასაც იღებს, ინოვაციურია და საბოლოოდ შრომის ეფექტურობაც მაღალი. ძლიერი კორპორატიული კულტურის შემთხვევაში თანამშრომელთა გადინებაც, რაც დღეს ბევრი კომპანიის ტკივილს წარმოადგენს,  არ დგას მწვავე პრობლემად. კულტურა აძლიერებს კომპანიის, როგორც დამსაქმებლის, რეპუტაციას და ახალი კვალიფიციური კადრების მოზიდვაც მარტივი ხდება.

მუდმივად უნდა გვახსოვდეს:
«უმთავრესი ორგანიზაციულ კულტურაში არის ადამიანებს შორის კომუნიკაცია» – ფაბრიციო პერინი

ისევე როგორც თითოეული ადამიანის პიროვნებად ჩამოყალიბებას მისი ხასიათი და ქცევა განსაზღვრავს, კომპანიის შემთხვევაშიც კორპორატიული კულტურა განაპირობებს კომპანიის იდენტობას, ქმნის გარკვეულ უსაფრთხოებას,  და როგორც უკვე აღვნიშნე, მნიშვნელოვნად უწყობს ხელს თანამშრომლების მოტივაციის ამაღლებას და კომპანიის გრძელვადიან წარმატებას.

თუ კიდევ ერთხელ კომპანიის წარმატების ფაქტორებზე დავფიქრდებით, პირველ რიგში ალბათ უნდა დავასახელოთ იდეა (კრეატიული, ინოვაციური), შეიძლება აქვე განსაკუთრებული ტექნოლოგიაც ვახსენოთ და აუცილებლად კაპიტალიც, რომელიც ამ იდეის განხორციელების და ბიზნესის ზრდის საშუალებას მოგვცემს. დღეს, როდესაც ფინანსურ რესურსებზე წვდომა და ამ რესურსით თუნდაც განსაკუთრებული ტექნოლოგიისა თუ ტექნიკის შეძენა შედარებით გამარტივებულია, კიდევ უფრო მნიშვნელოვანია ორგანიზაციული კულტურა, რომელსაც ვერანაირი კაპიტალით იყიდი.
თქვენ რას იტყვით, გაქვთ ორგანიზაციული კულტურა, რამდენად ძლიერია ის? 

თუ ამაზე არ გიფიქრიათ, ან ფიქრობთ, რომ ჯერ საამისოდ პატარა კომპანია ხართ, გახსოვდეთ რომ ეს ხანგრძლივი პროცესია, «უკულტორო კულტურის» ქონა კი დანაშაული საკუთარი კომპანიის წინაშე. კომპანიის ბრენდად ჩამოყალიბებისთვის მხოლოდ სლოგანი, ლოგო, კარგი პროდუქტი ან მომსახურება არ არის საკმარისი, ამისთვის შიდა პროცესები უნდა იყოს გამართული, თანამშრომელი უნდა იყოს ბედნიერი, ამაყი და მომხმარებელთან ერთად თქვენი ბრენდის ელჩი. ძლიერი კორპორატიული კულტურის გარეშე კი ამის მიღწევა შეუძლებელია.
«საუკეთესო ბრენდის ელჩები კომპანიისთვის მისი თანამშრომლები არიან» – რიჩარდ ბრენსონი

«კულტურა სტარტეგიას მიირთმევს საუზმედ» – პიტერ დრაკერი.
შეგიძლიათ ამ ყველაფერზე კიდევ ერთხელ  იფიქროთ საუზმობისას…
რამდენიმე კითხვას დაგიტოვებთ, თუ სურვილი გექნებათ, ამაზე ფიქრით დაიწყეთ:
•    რატომ ვარსებობთ (როგორც კომპანია)?
•    რას ვემსახურებით, რისი გვჯერა, როგორები ვართ?
•    ჩვენი მთავარი ღირებულებები რა არის?
•    რისი მიღწევა გვსურს, რა არის ჩვენი მთავარი მიზანი?

The post კულტურა სტრატეგიას მიირთმევს საუზმედ appeared first on BPN Georgia.

The post კულტურა სტრატეგიას მიირთმევს საუზმედ appeared first on BPN Georgia.