როგორ იქცევა გაურკვევლობა რეალურ ძალად

ნათია სხვიტარიძემ საკუთარი საფინანსო კომპანია პანდემიის პერიოდში დააარსა – ახლა კი თამამ ნაბიჯს დგავს და ამერიკის შეერთებულ შტატებში გასვლას აპირებს.

საუბარი გამბედაობაზე, კულტურასა და შინაგან ძალაზე და იმ კომბინაციაზე, რომელიც საჭიროა მდგრადი წარმატებისთვის.

ინტერვიუერი – კლაუდია გაბლერი

Ladies Drive: ნათია, საკუთარ თავს „ციფრების ადამიანს“ უწოდებდით?

ნათია სხვიტარიძე: აბსოლუტურად! სიზუსტე, სტრუქტურა და სიცხადე ადრეული ასაკიდანვე მხიბლავდა. ციფრები არ ტყუიან – ისინი საიმედო საფუძველს ქმნიან მკაფიო დაგეგმვისა და დასაბუთებული გადაწყვეტილებებისთვის.

Ladies Drive: ადრეული ასაკიდანვე მოგიწიათ მოქნილობის გამოვლენა?

ცხადია, კი! ფინანსურ და ბუღალტრულ სამყაროში – როგორც საქართველოში, ასევე საერთაშორისო დონეზე – ბევრი გამოწვევაა, განსაკუთრებით ქალებისთვის. მართალია, საქართველოში ბუღალტერთა უმრავლესობა ქალია, მაგრამ ფინანსურ სფეროში სტრატეგიული ან წამყვანი როლები ხშირად მაინც მამაკაცებს უკავიათ. ბევრი ვიმუშავე იმისთვის, რომ ეს მოძველებული სტერეოტიპები დამემსხვრია. მომთხოვნი პროფესიისა და ოჯახური ცხოვრების შეთავსებაც დიდ მოქნილობას მოითხოვდა. თუმცა, ყოველმა დაბრკოლებამ უფრო მდგრადი გამხადა, გააძლიერა ჩემი ადაპტაციის უნარი და საბოლოოდ ხელი შეუწყო ჩემი ლიდერული თვისებების გამოვლენას.

Ladies Drive: რას ნიშნავს მოქნილობა და უსაფრთხოება ქართულ კონტექსტში? არსებობს აქ კულტურული განსხვავებები?

საქართველოში მოქნილობა ხშირად ნიშნავს გაუმკლავდე გაურკვევლობას – იქნება ეს პოლიტიკური თუ ეკონომიკური არასტაბილურობა და ამავე დროს შეინარჩუნო ფოკუსი და გამძლეობა. უსაფრთხოების მიღწევა კი უფრო რთულია, განსაკუთრებით სამუშაო გარემოში. დიდ ბრიტანეთში, სადაც ვსწავლობდი და ვმუშაობდი, შრომითი უფლებები და პირადი თავისუფლება ინსტიტუციურად უკეთ არის დაცული. საქართველოში გაცილებით მეტი ძალისხმევა და შეუპოვრობაა საჭირო ჯანსაღი კორპორაციული კულტურის შესაქმნელად. მე ვამაყობ, რომ FAS Group-ში ჩვენ შევძელით ისეთი სამუშაო გარემოს შექმნა, რომელიც ევროპულ და ამერიკულ სტანდარტებს შეესაბამება.

Ladies Drive: რისი სწავლა შეუძლია ორივე კულტურას ერთმანეთისგან?

საქართველო ცხოვრობს გულით, სითბოთი, სტუმართმოყვარეობითა და ადამიანური სიახლოვით, რაც როგორც პირად, ისე პროფესიულ ურთიერთობებზე დიდ გავლენას ახდენს. ევროპისგან კი შეგვიძლია ვისწავლოთ სტრუქტურა, საიმედოობა და გრძელვადიანი სტრატეგიული დაგეგმვა. ვფიქრობ, რომ ემოციური ინტელექტისა და ოპერაციული დისციპლინის კომბინაცია მდგრადი წარმატების გასაღებია.

Ladies Drive: კომპანია პანდემიის დროს დააარსეთ და ამისთვის უარი თქვით უსაფრთხო, მაღალანაზღაურებად სამსახურზე, საიდან მოიკრიბეთ ეს გამბედაობა?

უკან რომ ვიხედები, ეს მართლაც გაბედული ნაბიჯი იყო, მაგრამ ისეთი, რომელიც სწორად მეჩვენებოდა. დიდი ხნის განმავლობაში მქონდა სურვილი, საკუთარი საქმე გამეკეთებინა, თუმცა სწორი მომენტი არასოდეს დგებოდა. როდესაც პანდემიამ მსოფლიო შეძრა, ეს, პარადოქსია, მაგრამ ჩემი მამოძრავებელი ძალა გახდა: საკუთარ თავს ვკითხე: „თუ არა ახლა, მაშინ როდის?“ ეს იყო ნახტომი რაღაც უცნობში, რომელსაც საფუძვლად ედო დიდი ხნის ოცნება და რწმენა, რომ გამოწვევებში ხშირად უდიდესი შესაძლებლობები იმალება.

Ladies Drive: როგორი იყო თქვენი ყველაზე მნიშვნელოვანი გამოცდილება დღემდე?

ყველაზე ღირებული გაკვეთილი იყო: გწამდეს საკუთარი თავის – განსაკუთრებით მაშინ, როცა სხვებს არ სჯერათ შენი. ოცნებები ხშირად არარეალურად გვეჩვენება, სანამ რეალობად იქცევიან. ასევე: მარტო ვერაფერს მიაღწევ. წარმატება გუნდური სპორტია. სწორი ადამიანები შენს გვერდით, ისევე მნიშვნელოვანია, როგორც საკუთარი ამბიცია.

Ladies Drive: სად გსურთ, რომ თქვენი კომპანია ათი წლის შემდეგ იყოს?

ჯერ კიდევ 2025 წლის ბოლომდე, მსურს FAS Group-ის აშშ-ის ფილიალი გავხსნა. ამაზე უკვე აქტიურად ვმუშაობთ. გრძელვადიან პერსპექტივაში, ჩემს კომპანიას ვხედავ, როგორც აღიარებულ მომწოდებელს მაღალი ხარისხის ფინანსური მომსახურებისა და ინოვაციური ციფრული გადაწყვეტილებების სფეროში – როგორც ევროპაში, ასევე აშშ-ში.

Ladies Drive: რა როლს თამაშობს თქვენთვის შვეიცარიული ფონდი BPN Georgia ?

BPN Georgia შესანიშნავი პარტნიორი იყო – განსაკუთრებით საწყის ეტაპზე. მცირე საწარმოებისთვის უზომოდ ღირებულია, გყავდეს გვერდით ისეთი სანდო ორგანიზაცია, რომელიც მენტორობას, რჩევებს გთავაზობს და გაძლევს სტიმულს. ამ მხარდაჭერამ გადამწყვეტი როლი ითამაშა ჩვენს განვითარებაში.

Ladies Drive: თქვენი სამი რჩევა, როგორ მოვიპოვოთ სტაბილურობა მოქნილობის საშუალებით გაურკვევლობის დროს?

1. იყავით თქვენი საქმის პროფესიონალები – იცნობდეთ თქვენს სფეროს საფუძვლიანად

2. შექმენით ძლიერი გუნდი – შემოიკრიბეთ ისეთი ადამიანები, რომლებსაც ენდობით და რომლებსაც სჯერათ თქვენი ხედვის.

3. გწამდეთ საკუთარი თავის – მაშინაც კი, როდესაც რთული დრო დადგება. ურყევი თავდაჯერებულობა ამბიციას რეალობად აქცევს.

The post ნათია სხვიტარიძის ინტერვიუ შვეიცარიულ ბიზნეს ჟურნალ Ladies Drive-ში appeared first on BPN Georgia.

The post ნათია სხვიტარიძის ინტერვიუ შვეიცარიულ ბიზნეს ჟურნალ Ladies Drive-ში appeared first on BPN Georgia.

გარდა ნატურალური ხელნაკეთი საპნებისა და სხეულის მოვლის პროდუქტების წარმოებისა, კომპანია საპნის დამზადებისათვის საჭირო ყველანაირ ხელსაწყოსაც ყიდის. ზაზა სასწავლო კურსების მეშვეობით, თავის ცოდნას სხვებსაც უზიარებს. მეტი მომხმარებლის მოსაზიდად კი –  ის დისტრიბუციის ახალი არხებისა და საპნის დამზადების შესახებ სახელმძღვანელოს შექმნაზეც მუშაობს.

ჩემი ისტორია

ჩემს ერთ-ერთ შვილს თინეიჯერობაში სახეზე ძალიან მწვავე გამონაყარი ჰქონდა, თვეების განმავლობაში ვაგროვებდი ინფორმაციას, თუ როგორ მზადდებოდა საპონი და ასევე სხვადასხვა მეთოდებისა  და ხელსაწყოების გამოყენებასაც კი ვცდილობდი, რომ შედეგი მალე დაგვენახა. საბოლოოდ, სასურველი შედეგის მიღწევა მაინც შევძელი და ჩემი შვილის კანს ვუმკურნალე. ამ შედეგმა ძალიან დიდი მოტივაცია მომცა, საპნებზე მუშაობა გავაგრძელე და ჩემი ენთუზიაზმის წყალობით, ამ პროცესში ჩემი ოჯახის ყველა წევრი ჩავრთე. წარმოებიდან დაწყებული მარკეტინგით  დამთავრებული, ისინი ყველაფერში მეხმარებოდნენ.

პანდემიის პერიოდი  ჩვენი ოჯახისთვის ძალიან რთული აღმოჩნდა, დროებით სოფელში გადაცხოვრება მოგვიწია. სწორედ ასეთი გამოწვევების დროს ვისწავლე,რომ ნებისმიერი პრობლემიდან გამოსავალი ყოველთვის არსებობს. სოფელში ექსპერიმენტების ჩატარებასა და მცენარეების დარგვას ვაგრძელებდი და როცა ქალაქში დავბრუნდი, საქართველოში საპნის დამზადების პირველი კურსი დავაარსე.

სანამ BPN Georgia – ს შესახებ შევიტყობდი, ჩემი კომპანია ისეთ ნავს ჰგავდა, რომელიც დინებას მიჰყვებოდა.ბიზნესს ძალიან ინტუიციურად და სამოყვარულო დონეზე ვმართავდი. სემინარებისა და ინდივიდულური ქოუჩინგების საშუალებით კი – ვისწავლე როგორ მემართა ნავი, ისე როგორც მე მსურდა.

     ახლა უკვე მიზანმიმართულად ვვითარდები და ჩემს ბიზნეს იდეებს უფრო რეალისტურად ვუყურებ. ამ ეტაპზე ახალ პროდუქტებზე ვმუშაობ, ვცდილობ ისეთ დამატებით სადისტრიბუციო არხებში გავფართოვდე, როგორიცაა  თუნდაც კოლაბორაციები სასტუმროებთან, აფთიაქებთან და სპა ცენტრებთან. ასევე  საგამოფენო სივრცის გახსნასაც ვგეგმავ.

რა მოგწონთ თქვენს საქმიანობაში ყველაზე მეტად?

ძალიან მიხარია რომ ვქმნი ისეთ ბუნებრივ, ჯანსაღ, მდიდრულ პროდუქტს, რომელსაც ბევრი ადამიანისათვის სარგებლის მოტანა შეუძლია. გარდა ამისა, ძალიან მომწონს კრეატიულობა და ინოვაციურობა.

როგორ შეცვალეთ თქვენი ქმედებებით თქვენი გარემო?

საპნის კურსების დახმარებით, მხარს ვუჭერ ქართული კოსმეტიკის ინდუსტრიის განვითარებას. გარდა ამისა, ძალიან მახარებს ის ფაქტიც, რომ ჩემი საპნები  უამრავ ადამიანს კანის პრობლემების დაძლევაში დაეხმარა.

რა სირთულეებს აწყდებით?

ხანდახან ბაზარზე  ნედლი მასალის პოვნა ძალიან რთულია. თუ მასალა დამაკლდება,  ჩემი პროდუქტის წარმოება რისკის ქვეშ დგება. მაშინ მე იძულებული ვარ ეს მასალა სხვა ინგრედიენტით ჩავანაცვლო. ეს ძალიან შრომატევადი პროცესია, რომელიც დიდ დროს, კვლევებისა და ექსპერიმენტების  ჩატარებას მოითხოვს, თუმცა, საბოლოოდ  ყველაფერი დადებითად აისახება პროდუქტზე და ხანდახან მას საპნის ახალი რეცეპტის აღმოჩენამდეც კი მივყავარ.

რას ურჩევდით სხვა მეწარმეებს?

გიყვარდეთ ის საქმე,რასაც აკეთებთ და დაბრკოლებებს არ შეუშინდეთ!

The post გამოწვევები გვაჩვენებს,რომ გამოსავალი ყოველთვის არსებობს! appeared first on BPN Georgia.

The post გამოწვევები გვაჩვენებს,რომ გამოსავალი ყოველთვის არსებობს! appeared first on BPN Georgia.

კარგი კონტაქტების, რეპუტაციისა და დიდი ინტუიციის წყალობით, ნინო ენების ინოვაციურ სკოლას აფუძნებს, თუმცა მალევე ხვდება რომ წარმატებული ბიზნესის მართვისთვის მხოლოდ ეს საკმარისი არ არის.

დასაწყისშივე ნინომ უამრავი სირთულე გადალახა და ახლა  თავის სტუდენტებს არამარტო ინგლისური ენის, არამედ ადამიანების სიყვარულსაც ასწავლის.

ნინოს ენის სკოლა ინოვაციურ სწავლებასა და მეთოდებს ეფუძნება. ყველა ასაკის მოსწავლეები უცხო ენას სწრაფად და ინტუიციურად არა მხოლოდ ორ ფილიალში, არამედ მთელი მსოფლიოს გარშემო ონლაინ გაკვეთილებითაც სწავლობენ. სკოლა მოსწავლებს  ასევე აძლევს იმის საშუალებას,  რომ მონაწილეობა მიიღონ  საერთაშორისო პროექტებსა და პროგრამებში.

  ჩემი ისტორია

მე კერძო მასწავლებელი ვიყავი და საჯარო სექტორში ვმუშაობდი – მქონდა კარგი კავშირები და რეპუტაცია. თუმცა, ყოველთვის ვოცნებობდი ისეთი ინოვაციური სკოლის შექნაზე, სადაც მოსწავლეები ხალისით ისწავლიდნენ, თანაც ვხედავდი, რომ ასეთი სკოლის მოთხოვნა ბაზარზე დიდი იყო.

ყველაფრის შექმნა ინტუიციურად დავიწყე, თუმცა მალევე მივხვდი რომ ბიზნესის მართვის ცოდნა და გამოცდილება მაკლდა.

როდესაც BPN-ის სემინარს პირველად დავესწარი, ძალიან დავიბენი, რადგან მივხვდი რომ ბევრი რამ არ ვიცოდი, გაფანტული და არეული ვიყავი. თუმცა, ამავდროულად ვხვდებოდი რომ  თურმე პროცესებში ბევრი რამ ინტუიციურად სწორად გამომდიოდა.  ასევე ძალიან დიდი მოტივაცია შემძინა იმის ცოდნამაც, რომ ჩემი წარმატებით დიდი გუნდი იყო დაინტერესებული.

ახლა ფინანსები, მენეჯმენტი და მარკეტინგი უფრო უკეთ მესმის.  ჩემი სკოლის მკაფიო სტრუქტურა, პროცესები და  მიზნებიც უკვე კარგად მაქვს ჩამოყალიბებული.

ყველაზე რთული და გარდამტეხი მოვლენა იყო მაშინ, როდესაც სკოლის  განვითარებისთვის ბანკიდან დიდი სესხი ავიღე. გავრისკე და ჩვენი შენობა თავიდან გავარემონტე, დროთა განმავლობაში 10 ახალი თანამშრომელიც ავიყვანე და დედაქალაქში დამატებითი ფილიალიც კი გავხსენი!

ამ გადმოსახედიდან, ეს ყველაფერი არ აღმოჩნდა ისეთი რთული, როგორიც მაშინ მეჩვენებოდა. კარგი გამოცდილება იყო. დღეს უკვე მაღალფუნქციური ჯგუფი მყავს. ისინი შთამაგონებენ და  ისეთი ახალი იდეების ჩამოყალიბებაში მეხმარებიან, როგორიცაა დამატებითი საკვირაო ან საზაფხულო სკოლებისა ან ინგლისურენოვანი ლიტერატურული კლუბების დაარსება.

რა მოგწონთ თქვენს პროფესიაში ყველაზე მეტად?

ძალიან მსიამოვნებს როდესაც მოსწავლეებს ვასწავლი. მომწონს ის ფაქტი,რომ შემიძლია ადამიანების ცხოვრებაზე პოზიტიური გავლენა ვიქონიო.

როგორ შეცვალეთ თქვენი გარემო თქვენივე ქმედებებით?

ენის კარგად სწავლისა და საერთაშორისო პროგრამებში მონაწილეობით, ჩვენი რეგიონის ბავშვებს  ეძლევათ შესაძლებლობა მიიღონ საუკეთესო კოსმოპოლიტური განათლება და შემდგომში ჩვენს ქვეყანას კარგად გამოადგნენ.

რა არის თქვენთვის ყველაზე დიდი გაკვეთილი?

ყველაფრის მიღწევაა შესაძლებელი. არ აედევნო ბედნიერებას,ის ყოველთვის უკვე შენს გვერდითაა!

რა არის თქვენი შემდეგი გამოწვევა?

მაღალი კვალიფიკაციის მქონე მასწავლებლების მოძიება ძალიან რთულია.მომავალში, ასევე ძალიან დიდი სურვილი მაქვს, გამოუცდელ მასწავლებლებს  საშუალება მივცე რომ ანაზღაურებადი სტაჟირების მეშვეობით პროფესიულად განვითარდნენ.

რას ურჩევდით სხვა მეწარმეებს?

კარგად დაფიქრდით, თქვენი საქმის კეთება თქვენთვის სახალისო არის თუ არა.

The post მეწარმეობა ისეთივე სახალისო უნდა იყოს, როგორიცაა სწავლა appeared first on BPN Georgia.

The post მეწარმეობა ისეთივე სახალისო უნდა იყოს, როგორიცაა სწავლა appeared first on BPN Georgia.

ბუნებით ოპტიმისტ ნიკოლოზს ყოველთვის სჯერა რომ დასახულ მიზნებს აუცილებლად მიაღწევს.თუმცა,მაინც გაურკვევლობაში ვარდება, როდესაც მამის გარდაცვალების შემდეგ, ხილის გაშენიანების ბიზნესს თავში ჩაუდგება და ისეთ ინდუსტრიაში შეაბიჯებს,რომლის შესახებაც არაფერი გაეგება.

დღეს კი-არამარტო მისი ნერგები, არამედ მისი ბიზნესიც ჰყვავის!

ალუბალი, ვაშლატამა, ყურძენი და ა.შ – 30 ჰექტარზე მეტ ტერიტორიაზე, ნიკოლოზის კომპანია ხილის მრავალფეროვან  სახეობებს აშენიანებს-მათ შორის არის ხილის ისეთი სახეობებიც, რომლებიც ქართული ბაზრისთვის ადრე სრულიად უცნობი იყო. ნიკოლოზის პროდუქტები უმაღლესი ხარისხისაა, ამიტომაც  ღირებულება ჩვეულებრივ პროდუქტთან შედარებით უფრო ძვირია. ნელნელა ის საკუთარ ბრენდს ანვითარებს.

ჩემი ისტორია

როდესაც მამა გარდაიცვალა, მაშინ სულ სხვა ინდუსტრიაში ვმუშაობდი. უეცრად ჩვენი ოჯახი დიდი დილემის წინაშე დადგა – მისი ბიზნესი ან უნდა გაგვეყიდა ან გაგვეგრძელებინა. კარგად დავფიქრდი,დავათვალიერე ჩვენი მოშენიანებული ხილი და მივხვდი რომ ბაზარზე გარკვეული ნიშები ჯერ კიდევ არსებობდა. გადავწყვიტე გავმხდარიყავი ინოვატორი და მამას ბიზნესი გამეგრძელებინა. კომპანიაში ძალიან დიდი ინვესტიცია ჩავდე,რასაც ყველა სკეპტიკურად უყურებდა.ჩემს გარშემო ყველას ეგონა რომ გავგიჟდი. სიმართლე გითხრათ, მეც არ ვიცოდი სწორად ვიქცეოდი თუ არა, რადგან ეს ინდუსტრია ჩემთვის ძალიან უცხო იყო.

როდესაც BPN-ს პირველად ვესტუმრე, ჩვენ ყველა ჩემი ხედვა და იდეა ბიზნეს გეგმად ვაქციეთ.როცა ქოუჩინგებმა დაადასტურა რომ ყველაფერს სწორად ვაკეთებდი, ამან უზარმაზარი მოტივაცია მომცა.

ყოველ სეზონზე ახალ ჯიშების გამოყვანას უფრო დიდ დროსა და ენერგიას ვუთმობ, შემდეგ კი სულმოუთქმელად ველოდები მოსავლის აღების დროს. ახალი ჯიშებით ძველ, გამოუსადეგარ ჯიშებს ნელნელა ვანაცვლებ. ახალი თესლების მისაპოვებლად, კი თურქეთში, ესპანეთსა და ამერიკაში ახალი კავშირები დავამყარე.

ნელნელა ახალ ტექნოლოგიებსაც ვსწავლობ : დაგეგმილი მაქვს სარწყავი სისტემების, სეტყვის დამცავი ბადეების, ცივი საწყობისა და სათბურის მშენებლობა. ამ ეტაპზე ბიზნესი სტაბილურად ვითარდება. ვცდილობთ განვითარება გავაგრძელოთ და ჩვენი კომპანია ბრენდად ვაქციოთ. ვფიქრობ მაღაზიის გახსნაზეც და ასევე დიდი სურვილი მაქვს რომ მალე აგროტურიზმშიც ჩავერთო.

რითი ხართ ყველაზე ამაყი?

ზოგადად რომ ვთქვათ- ძალიან ამაყი ვარ,რომ არავის მიმართ არანაირი დანაშაულის გრძნობა არ გამაჩნია. როგორც მეწარმე კი იმით ვარ ამაყი, რომ სასოფლო-სამეურნეო სექტორში ინოვატორი ვარ, არამარტო ახალი ჯიშების აღმოჩენაში, არამედ მოშენების ტექნოლოგიების თვალსაზრისითაც.

როგორ შეცვალეთ თქვენი გარემო თქვენივე ქმედებებით?

ახალგაზრდა ფერმერები ახლა  ახალი ჯიშების გამოყვანით კიდევ უფრო  მეტად დაინტერესებულები არიან. ადრე ამ ყველაფერს სკეპტიკურად უყურებდნენ და ძველ ტრადიციულ გზებს უფრო მიჰყვებოდნენ. ახლა კი როდესაც ჩემი შედეგები დაინახეს, მოტივაცია მიეცათ, რომ თავიანთ ბიზნესებშიც უფრო ინოვაციურები გახდნენ.

თქვენი ყველაზე დიდი გაკვეთილი?

ვისწავლე, რომ  მე, როგორც მეწარმეს, ყოველთვის უნდა შემეძლოს ერთი ნაბიჯის უკან გადადგმა, რომ რთულ სიტუაციებშიც კი სწორად ვიმოქმედო. ასევე ვისწავლე, თუ რამდენად მნიშვნელოვანია ბიზნესის გამრავალფეროვანება.

რას ურჩევდით სხვა მეწარმეებს?

ყოველთვის ეძიეთ რაიმე ახალი და მოუსმინეთ თქვენი გულის ხმას. მიზნის მისაღწევ გზაზე არ შეუშინდეთ გამოწვევებს. სწორედ ასე გახდებით წარმატებული.

The post ინვესტიცია ახალ ხილსა და იდეებში appeared first on BPN Georgia.

The post ინვესტიცია ახალ ხილსა და იდეებში appeared first on BPN Georgia.

როგორ უნდა მოვიქცეთ,მაშინ როცა ბავშვები ხილს არ ჭამენ?  გამოვაშროთ!

ამ კითხვაზე პასუხს სოფო და მისი ორი და ლოგიკურად გვცემენ. ალბათ, მაშინ, სამზარეულოს მაგიდასთან ვერც კი წარმოიდგენდნენ, რომ ეს პასუხი სამაგალითო კომპანიის დაარსებამდე მიიყვანდათ.

მუსიკალური კარიერის ნაცვლად, სოფო სატელევიზიო ინტერვიუებს ახლა მეწარმის ამპლუაში წერს, ამ პროცესით კი იგი სხვების ინსპირაციის წყაროც კი ხდება.

სოფო თავის 2 დასთან და მათ თანამშრომლებთან ერთად, ადგილობრივი ხილითა და პროდუქტებით სხვადასხვა სახის ჩირს, დაშაქრულ ხილს, შოკოლადსა და ტყლაპს – ხილის ტყავისგან დამზადებულ ქართულ უნიკალურ დესერტს აწარმოებს. პროდუქცია კი როგორც საკუთარ ბაზარზე, ასევე საცალო ვაჭრობითაც იყიდება.

ჩემი ისტორია

ჩვენი კომპანია ფაქტობრივად შემთხვევით შეიქმნა. მოსავლის აღების სეზონზე, ხშირად დიდი რაოდენობით ხილი გვრჩებოდა, რომელსაც ჩვენი შვილები აღარ ჭამდნენ, ამის გამო კი ხილის გამოშრობა დავიწყეთ. და აი საოცრება – გამომშრალი ხილი ყველას ძალიან შეუყვარდა! ექსპერიმენტების ჩატარება სამზარეულოს მაგიდაზე გავაგრძელეთ, მამამ ხილისთვის გამოსაშრობი ღუმელიც კი დაგვიმზადა. მალე ჩვენს პროდუქტზე მოთხოვნა არამარტო ოჯახში, არამედ ძველ თბილისში მდებარე სუვენირების მაღაზიებსა და სასტუმროებშიც გაიზარდა. პირველი სამი წელი ყველაფერს დამოუკიდებლად  ვმართავდით, თუმცა  ამ პერიოდში ძალიან ბევრ გამოწვევასაც შევეჯახეთ.

როცა წარმოების მასშტაბები გავზარდეთ, მოულოდნელად აღმოვაჩინეთ რომ ჩვენი ჩირი ჩრჩილებს დაუზიანებიათ – ეს ჩვენთვის დიდი შოკი იყო! სასომხეთში ჩირის მწარმოებელმა გვასწავლა, როგორ შეგვენახა ხილი ისე, რომ მსგავსი შემთხვევა აღარ განმეორებულიყო.

ამ ამბიდან ცოტახნის შემდეგ, BPN Georgia-ს შესახებაც გავიგე. სემინარებმა მალევე დაგვარწმუნა, რომ როგორც მეწარმეებს, წინსვლა მხოლოდ იმ შემთხვევაში შეგვეძლო, თუ ჩვენს მიდგომას ფუნდამენტულად შევცვლიდით და მენეჯმენტს პროფესიონალურ დონეზე ავიყვანდით. ჩვენ ეს ყველაფერი შევძელით : დღეს უკვე საქართველოს სამ უდიდეს ქალაქში ჩვენი დახლები გვაქვს. ჩვენი პროდუქცია იყიდება მაღაზიებში, სასტუმროებში და აეროპორტის დუთი ფრიშიც კი!

ჩვენი სამომავლო მიზანი – მასიური წარმოება და ექსპორტია. უკვე ვიპოვეთ დიდი ფართობი, რომელსაც ყველანაირი უმაღლესი ჰიგიენური სტანდარტების გათვალისწინებით ვაწყობთ და ასევე შესაბამის ხელსაწყოებსაც ვიძენთ.

რა იყო თქვენი პირველი აზრი,როდესაც BPN-ის შესახებ გაიგეთ?

როცა პირველად სემინარზე დასწრების მოწვევა მივიღე, ყველაზე დიდი ყურადღება სიტყვა შვეიცარიამ მიიპყრო. ჩემთვის შვეიცარია წარმატებასთან, განვითარებასა და შრომისმოყვარეობასთან ასოცირდება.

ქოუჩინგის რომელმა გამოცდილებამ მოახდინა თქვენზე ყველაზე დიდი ზეგავლენა?

ჩემთვის ერთერთი ყველაზე საინტერესო და დასამახსოვრებელი გამოცდილება იყო, როდესაც შვეიცარიიდან კონდიტერი გვესტუმრა და  შოკოლადში ამოვლებული ჩირების ხაზის განვითარებაში ძალიან დაგვეხმარა. ორი წლის შემდეგ კი შვეიცარიაში, იგივე კონდიტერთან ერთად, ჩვენ შესაძლებლობა გვქონდა, მონაწილეობა სასწავლო პროგრამაში მიგვეღო.

როგორ შეცვალეთ თქვენივე ქმედებებით თქვენი გარემო?

სხვა ადამიანებისთვის მოტივაციის წყარო გავხდი. როდესაც ჩემს ისტორიას ტელეინტერვიუებში ვყვები, ამით სხვა ადამიანებს ვაჩვენებ რომ მათაც შეუძლიათ გააკეთონ იგივე, რაც მე შევძელი-ჰქონდეთ გამბედაობა რომ რაიმე ახალი წამოიწყონ!

რა არის თქვენთვის ყველაზე დიდი გაკვეთილი?

გამოსავალი ყველა პრობლემიდან არსებობს. როდესაც პრობლემა ჩნდება,მისი გადაჭრის გზებიც ჩემს თავში უნდა ვეძიო.

The post პრეტენზიულ ბავშვებს გამჭრიახი მშობლები ჰყავთ! appeared first on BPN Georgia.

The post პრეტენზიულ ბავშვებს გამჭრიახი მშობლები ჰყავთ! appeared first on BPN Georgia.

კომპანიამ სამკაულის ძველი და მივიწყებული დამზადების ტექნიკა გააცოცხლა და დღეს თანამედროვე ქართულ სამკაულს ზუსტად ამ ტექნიკის გამოყენებით ამზადებს. ასეთ სამკაულებს სხვაგვარად მხოლოდ მუზეუმებში თუ შეხვდებით. როგორც სამკაულების ოსტატი, დავითი, მუდამ ცდილობს, რომ თავისი მხატვრული ხედვა, წარმოების ტექნიკური დეტალები და ეკონომიკური ფაქტორები სწორად დააბალანსოს.

ჩემი ისტორია

მე ხელოვანების ოჯახში გავიზარდე. მამაჩემი და ჩემი ძმა  სამკაულებს ამზადებდნენ. მეც  ჩემი პირველი შემოსავალი სტუდენტობის პერიოდში, სწორედ სამკაულების დამზადებითა და მხატვრობით გამოვიმუშავე. 2016 წელს კი, სამივემ ერთად გადავწყვიტეთ კომპანიის დაარსება.

ამ ამბიდან ზუსტად ერთი წლის შემდეგ,  BPN Georgia-ში სემინარს პირველად  დავესწარი. ახლა უკვე 16-ზე მეტ სემინარზე ვარ ნამყოფი – თითოეული მათგანიდან რაღაც პრაქტიკული ცოდნა მივიღე, რაც შემდგომში ჩემს ყოველდღიურ საქმიანობაში გამოვიყენე. მაგალითად, ,,ბიზნეს კოკპიტის” შექმნა — ყოველთვის მეხმარება რომ მნიშვნელოვანი გადაწყვეტილებების მისაღებად საჭირო ინფორმაცია  საჭირო დროს მქონდეს.

დღეს უკვე ახალი თანამშრომლის შერჩევის პროცესში პიროვნული პროფილის ანალიზს სისტემატურად ვიყენებ. მარტო სხვების რეკომენდაციებს აღარ ვენდობი და თავადაც ვამოწმებ, შეესაბამება თუ არა ადამიანი ჩვენს კომპანიას. თანამშრომლებთან მუშაობის პროცესში მთავარი გაკვეთილი რაც ვისწავლე, იყო ის რომ აუცილებლად უნდა დასახო მიზანი და მიღწევის გზები მთლიანად მათ მიანდო. ახალ თანამშრომლებში კი განსაკუთრებით ვაფასებ მეწარმეობრივ აზროვნებას — მინდა, რომ მარტო ჩემი ბრძანებების შემსრულებლები არ იყვნენ და ისინიც მეწარმეებივით ფიქრობდნენ.

ამ ეტაპზე უკვე 2 მაღაზიას, სახელოსნოს და 10-კაციან გუნდს ვმართავთ. შემოსავალი მზარდია, თუმცა ამასთან ერთად, ხარჯებიც სერიოზულად იზრდება.

იმისთვის, რომ გაყიდვები, მოგება და ზრდის ტემპი კიდევ უფრო  გავაუმჯობესოთ, მარკეტინგზე მეტი ყურადღების გამახვილება გვჭირდება. ამჟამად ახალი ვებსაიტის შექმნაზე ვმუშაობთ. ჩვენი მთავარი მიზანი ახალი ბაზრების ათვისებაა – განსაკუთრებით აშშ-ში, სადაც ბევრი ემიგრანტი ქართველი ცხოვრობს,  რომლებსაც ქართული სამკაულები ძალიან აინტერესებთ.

ყველაზე მეტად რა მოგწონს ამ ინდუსტრიაში?

სამკაულის ხელოვნება გარკვეულ წესებს ექვემდებარება, რადგან მასალასაც და დამუშავების ტექნიკასაც თავისი წესები გააჩნია. სწორედ ეს შეზღუდვები ხდის შემოქმედებას ერთდროულად რთულსა და საინტერესოს  –  და სწორედ ეს მომწონს. ჩემი ფანტაზია ამ წესებს უნდა შევუთავსო, მაგრამ ამის მიუხედავად მაინც შემიძლია რაღაც განსაკუთრებულის და უნიკალურის შექმნა.

რა არის ყველაზე დიდი გამოწვევა?

ალბათ პასუხისმგებლობის ბევრ ადამიანზე აღება. მაგალითად, იმის უზრუნველყოფა რომ ხელფასები დროულად ჩაირიცხოს, ამასთან ერთად მე ჩემს ოჯახსაც ყურადღება უნდა მივაქციო.

რას ურჩევდი სხვა მეწარმეებს?

გაითავისეთ და ისწავლეთ თქვენი შეცდომებიდან. ტკივილი საუკეთესო მასწავლებელია, შეცდომების დაშვება კი გამდიდრებთ. დააგროვეთ რაც შეიძლება მეტი გამოცდილება, რომ თქვენი მომავალი უკეთესი გახადოთ.

შენი ოცნება?

ჩემი ცხოვრება ჩემი ახდენილი ოცნებაა, რისთვისაც ძალიან მადლიერი ვარ. ჩემი საუკეთესო დღე არის ,,დღეს”!

The post შეცდომები გვამდიდრებს, ხოლო გამოწვევების გადალახვა საინტერესოა appeared first on BPN Georgia.

The post შეცდომები გვამდიდრებს, ხოლო გამოწვევების გადალახვა საინტერესოა appeared first on BPN Georgia.

2.    სწორი მენეჯმენტი
მუსიკის სახლის დამფუძნებლებს გაცნობიერებული აქვთ, რომ მხოლოდ ხარისხიანი პროდუქტის შეთავაზება არ წარმოადგენს კომპანიის წარმატების გარანტიას. მუდმივი განვითარება, შიდა მენეჯერული პროცესების მოქნილობა და ცვალებად გარემოზე და ტენდენციებზე მორგება კომპანიას შეცდომებისგან აზღვევს და კონკურენტებთან მიმართებაში უკეთეს პოზიციაში აყენებს.

3.    კვალიფიციური თანამშრომლები
ნებისმიერი კომპანიის წარმატება მისი მომხმარებლების კმაყოფილებას ეფუძნება. მომხმარებელთა კმაყოფილება კი კომპანიის თანამშრომლების პროფესიონალიზმზე და ჯანსაღ კორპორატიულ კულტურაზე დგას. ამ მიმართულებითაც უწყობს ნინო გუნდს ხელს პარტნიორებთან ერთად და როგორც მათი პროფესიული გადამზადების, ისე გუნდურობის და სასიამოვნო სამუშაო გარემოს შექმნის მიზნით მრავალ ღონისძიებას ატარებს.

,,კომპანიის არსებობის თითქმის 20 წლიან პერიოდში მუდმივად იყო განვითარების და წინსვლის სურვილი, თუმცა ეს ხდებოდა არაორგანიზებულად და კონკრეტული გრძელვადიანი მიზნების დასახვის გარეშე. კომპანია გაიზარდა, გადალახა „გარდატეხის ასაკიც“ და სულ სხვა მოთხოვნები გაჩნდა. პირადად ჩემი, როგორც ხელმძღვანელის ეტაპობრივმა განვითარებამ მომცა სტიმული, ჩემი კოლეგებიც გადმომეყვანა მუდმივი და მიზანმიმართული განვითარების ტალღაზე.
მუსიკის სახლის სწრაფვა სრულყოფილებისკენ ბევრ რამეს პოზიტიურად ცვლის და ამაში მხოლოდ მუსიკალური ინსტრუმენტები და ბრენდები არ იგულისხმება. განვითარების მაღალ საფეხურზე გადასასვლელად საჭირო იყო ჩვენი თანამშრომლების მუშაობის ეფექტიანობის ამაღლება, რაშიც ჩვენი პარტნიორი ბპნ ჯორჯია დაგვეხმარა.  დავგეგმეთ 4 დღიანი ერთობლივი სემინარი, რამაც ძალიან კარგი შედეგი მოიტანა მრავალი მიმართულებით:
–    უკეთ გავიცანით თანამშრომლებმა ერთმანეთი და ბევრი კარგი შესაძლებლობა აღმოვაჩინეთ ერთმანეთში.
–    გაგვეზარდა მოტივაცია – მიგვეღწია მეტისთვის, როგორც პირადი, ისე სამსახურებრივი მიმართულებით.
–    გავიგეთ, როგორ დავისახოთ მიზნები, როგორ მივაღწიოთ მათ და როგორ გავხადოთ ჩვენი შრომა უფრო ეფექტური.
–    თანამშრომლებმა დააფასეს მენეჯმენტის მონდომება და სხვა.
ვფიქრობ, მომავალში აუცილებლად უნდა დავგეგმოთ მსგავსი სემინარები, გავიხსენოთ დავიწყებული და ვისწავლოთ ახალი. სიახლის მოსმენა და კოლეგებთან გაზიარება ყოველთვის სასიამოვნოა“.

ნინო დევაძე

The post მუსიკის სახლი: მეგობრობით, ცვლილებებით და მუსიკის ჰანგებით წარმატებისკენ appeared first on BPN Georgia.

The post მუსიკის სახლი: მეგობრობით, ცვლილებებით და მუსიკის ჰანგებით წარმატებისკენ appeared first on BPN Georgia.

ძალიან რთულია საკუთარ თავზე საუბარი და ბევრს ვერაფერს გეტყვით გარდა იმისა, რომ ვარ დედა, მეუღლე, მეგობარი  და უბრალოდ ადამიანი, რომელსაც აქვს უამრავი ინტერესი და ამბიციური სამომავლო გეგმები.

• რატომ ეს ბიზნესი? 

პირველ რიგში, მსურდა ევროპაში მიღებული განათლება და გამოცდილება, იქაური სამუშაო მოდელი გადმომეტანა საქართველოში. ბაზრის კვლევამ აჩვენა, რომ ხარისხიანი ბუღალტრული და ფინანსური მომსახურების სერიოზული დეფიციტი იყო ჩვენს ქვეყანაში და მე ვხედავდი, რომ პროფესიონალ გუნდთან ერთად ამის გაკეთება შემეძლო. FAS Group-ის დაარსებისთვის მომიწია საერთაშორისო ორგანიზაციაში საკმაოდ მაღალი პოზიციის დატოვება, იყო პანდემია და ეს ყველაფერი ძალიან დიდ რისკებს  უკავშირდებოდა.

FAS Group ბაზარზე 2021 წლიდან ოპერირებს, თუმცა მის დაარსებას ძალიან საინტერესო და დიდი ისტორია აქვს. ყველაფერი დაიწყო 2013 წელს, როდესაც დიდ ბრიტანეთში გავიარე სამაგისტრო პროგრამა საერთაშორისო ფინანსების მიმართულებით და მქონდა საშუალება გამეცნო ადგილობრივი ფინანსური და აუდიტორული მომსახურების გამწევი კომპანიები. ეს იყო ძალიან შთამბეჭდავი გამოცდილება და მაშინვე ვიცოდი, რომ მინდოდა საკუთარი ორგანიზაციის დაარსება. თუმცა ამას ცოდნასთან ერთად სჭირდებოდა გამოცდილება. დავიწყე ამ გამოცდილების დაგროვება, ვიმუშავე მთავარი ბუღალტრის და შემდგომ უკვე ფინანსური მენეჯერის პოზიციაზე, როგორც ქართულ ისე უცხოურ კომპანიებში.
2018 წელს დავარეგისტრირე FAS Group და ისე დაემთხვა, რომ ზუსტად ამ დროს მივიღე  მსხვილი საერთაშორისო კომპანიისგან ძალიან საინტერესო  შემოთავაზება, რასაც აუცილებლად უნდა დავთანხმებოდი და ამის გამო FAS Group-ის ფუნქციონირებამ გადაიწია 2021 წლამდე, სანამ არ მივიღე არსებული პოზიციის დატოვების და საკუთარი საქმის დაწყების გადაწყვეტილება.

• მთავარი სარგებელი, რომელსაც თქვენი პროდუქტი/სერვისი აძლევს მომხმარებელს?

FAS Group-ის მიერ მიწოდებული ბუღალტრული და ფინანსური სერვისების შედეგად, ორგანიზაციები არიან ბევრად უფრო მედეგი დღევანდელ სწრაფად ცვალებად გარემოში, აუმჯობესებენ მოგებას და დებენ უკეთეს შედეგებს უფრო სწრაფად, ვიდრე ამას ჩვენი სერვისის გარეშე მიაღწევდნენ.

• რაში მდგომარეობს თქვენთვის ბიზნესის წარმატების  ფორმულა? 

ჩვენს წარმატებას განსაზღვრავს უმაღლესი ხარისხის სერვისის მიწოდება, რაც ასეთი დეფიციტურია დღევანდელ რეალობაში. ეს არ არის მხოლოდ სიტყვები, ამაზე ჩვენი პარტნიორი კომპანიების რაოდენობა და მათი უკუკავშირი მეტყველებს. ჩვენთან ხარისხი მიიღწევა: მაღალი კვალიფიკაციით, მომხმარებლის საჭიროებების იდენტიფიცირებით, უსწრაფესი კომუნიკაციითა და უკუკავშირით.

• ყველაზე დიდი გამოწვევა, რომელიც აქციეთ შანსად? რა გასწავლათ ამ კონკრეტულმა შემთხვევამ?

რაც შეეხება გამოწვევებს, ორს მინდა ხაზი გავუსვა – ეს არის კვალიფიციური კადრების დეფიციტი, რომელმაც ჩვენს ზრდასთან ერთად იჩინა თავი და მისი მოგვარებისთვის მოგვიწია ბუღალტერთა სკოლის (FAS School) დაარსება, სადაც ჩვენივე რესურსებით დაინტერესებულ პირებს ვასწავლით, გადიან სტაჟირებას და წარმატებული კურსდამთავრებულები ჩვენთანვე რჩებიან სამუშაოდ.ხოლო მეორე სირთულე იყო და ჯერ კიდევ რჩება გამოწვევად მეწარმეების ცნობიერების ამაღლება ბუღალტრული აღრიცხვის საჭიროებასთან დაკავშირებით. სამწუხაროდ, მეწარმეთა უმრავლესობას  არ აქვს ინფორმაცია, თუ როგორ შეუძლია სწორი ბუღალტრული აღრიცხვის საშუალებით კომპანიის ბევრად უფრო სწრაფად განვითარება და უკეთესი შედეგების დადება. ამ საკითხზეც აქტიურად ვმუშაობთ, ვატარებთ სემინარებსა და ვორქშოპებს, ამ მიმართულებით ვთანამშრომლობთ სხვადასხვა ორგანიზაციებთან და მათთან ერთადაც ვაორგანიზებთ ღონისძიებებს, რასაც ძალიან კარგი შედეგები მოაქვს.

• რა  გაძლევთ ძალასა და ენერგიას თქვენი ყოველდღიური საქმიანობისთვის? 

ყოველდღიური საქმიანობისთვის ძალასა და ენერგიას ისევ ჩემივე საქმის სიყვარული და დასახული მიზნის ძალიან მკაფიოდ დანახვა მაძლევს, მიუხედავად ყოველდღიური უამრავი გამოწვევისა და სირთულისა ამ მიზნისკენ მიმავალ გზაზე.

• მთავარი მიზეზი რატომ BPN Georgia ?  

BPN Georgia-ს სახით მცირე და საშუალო კომპანიებს ჰყავთ კარგი მეგობარი და მხარდამჭერი, რომელიც მუდმივად მზად არის გვერდში დგომისა და საჭირო რჩევის მიცემისთვის. ეს კი საკმაოდ დიდი მნიშვნელობისაა,  განსაკუთრებით საწყის ეტაპზე.

• თქვენი გამოცდილების გათვალისწინებით რას  ურჩევდით მეწარმეებს? 

პრაქტიკიდან გამომდინარე მეწარმეებს ვურჩევდი მთავარ საქმეზე ფოკუსირებას და საქმის სწორად დელეგირებას, რაც კომპანიის წარმატების წინაპირობაა. ვურჩევდი ასევე, რაც შეიძლება მეტი ინფორმაციის მიღებას, მაგალითად ბუღალტრული და ფინანსური აღრიცხვის მნიშვნელობასა და როლზე კომპანიის წარმატებაში.

• როგორ ფიქრობთ, მომხმარებელია უპირატესი, თუ თქვენ?

ვფიქრობ, მომხმარებლის ინტერესების გათვალისწინებით, მაღალი ხარისხის სერვისის მიწოდება, აუცილებლად პარტნიორულ და თანაბარ პირობებში, ყოველგვარი უპირატესობების წარმოჩენის გარეშეა შესაძლებელი.  აუცილებელია, ურთიერთთანამშრომლობა და ინფორმაციის დროული გაცვლა, შესაბამისად ხარისხიც არ დააყოვნებს.

• წარსული, აწმყო თუ მომავალი?

აუცილებლად აწმყო და აწმყოში განხორციელებული ქმედებები სამომავლო მიზნების მისაღწევად! ცხადია, წარსული გამოცდილების გათვალისწინებით.

The post ჩემი ბიზნესის ისტორია – ნათია სხვიტარიძე appeared first on BPN Georgia.

The post ჩემი ბიზნესის ისტორია – ნათია სხვიტარიძე appeared first on BPN Georgia.

ვარ 5 საოცარი შვილის დედა, მოყვარული ფოტოგრაფი და ძალიან დიდ სიამოვნებას მანიჭებს ბუნებასთან ახლოს ყოფნა. რაც არ უნდა უცნაურად ჟღერდეს, არ ვუკრავ არცერთ მუსიკალურ ინსტრუმენტზე. თუმცა,  ნამდვილი მელომანი და ჭეშმარიტი მსმენელი ვარ.

რატომ ეს ბიზნესი? 

თავიდან, როდესაც უბრალოდ დავიწყეთ, ვერც ვაცნობიერებდი რასთან მქონდა საქმე, ახლა კი როცა მუსიკის სახლს თავისი წვლილი შეაქვს დიდ მუსიკალურ ინდუსტრიაში, ვგრძნობ, რამდენი ადამიანის შთაგონება შეგვიძლია, რამდენის გახარება და ზიარება ისეთ ხელოვნებასთან, როგორიცაა  მუსიკა. რა თქმა უნდა, ხარისხიანად.

მთავარი სარგებელი, რომელსაც თქვენი პროდუქტი/სერვისი აძლევს მომხმარებელს?
მსოფლიოში აღიარებული ბრენდების მუსიკალურ ინსტრუმენტებთან წვდომა, რაც გულისხმობს შეხებას, შეგრძნებას, მოსმენას და ინსტრუმენტების ისე შერჩევას, რომელიც  საშუალებას მოგცემს გამოხატო საკუთარი თავი და შენს გვერდზე მყოფებს მაქსიმალური სიხარული მიანიჭო. თუმცა, ყველაზე მთავარი ალბათ მუსიკოსებისთვის ისაა, რომ მსოფლიოში ცნობილი სხვადასხვა მუსიკალური ბრენდის ოფიციალური პარტნიორები ვართ და დაახლოებით ოცი წელია სანდოობისა  და ერთგულების გარანტიას ვნერგავთ.

რაში მდგომარეობს თქვენთვის ბიზნესის წარმატების  ფორმულა? 
ფორმულა მარტივია, ჯიუტად წინსვლა, მიუხედავად უამრავი დაბრკოლებისა, როგორც კომპანიის შიდა სამზარეულოში, ასევე ქვეყანასა და მსოფლიოში.  ყველა გამოწვევის მიღება და საქმის იმედიანად გაგრძელება.

ყველაზე დიდი გამოწვევა, რომელიც აქციეთ შანსად? 

ფაქტია, რომ ყოველდღიური რუტინა ზოგჯერ გვაკარგინებს ან არ გვაძლევს საშუალებას დავინახოთ ის შანსი, რაც ხშირად მოგვეცემა ხოლმე. როცა გადავწყვიტე მეტი დრო დამეთმო განვითარებისთვის და ნაკლები ყოველდღიური საქმისთვის, მაშინ მივხვდი, რომ ბევრ რამეს ვერც კი ვაცნობიერებდი, სწორედ მაშინ აღმოვაჩინე, რომ ჰორიზონტი გაცილებით ფართო ყოფილა, ვიდრე წარმოვიდგენდი.

რა  გაძლევთ ძალასა და ენერგიას თქვენი ყოველდღიური საქმიანობისთვის? 

ენერგიას და წინსვლის სურვლის მაძლევს იმის შეგრძნება, რომ მარტო არ ვარ, ძალას მაძლევს იმაზე ფიქრიც, რომ შემიძლია მაგალითი ვიყო ჩემი გადადგმული ნაბიჯით თუ ქმედებით და  სხვასაც მივცე მოტივაცია, მცირედი ბიძგი თუ იდეა, დავანახო რამდენი შესაძლებლობა არსებობს მაშინაც კი, როცა  მრავალშვილიანი დედა ხარ და საზრუნავი და საფიქრალი არასოდეს გელევა.

მთავარი მიზეზი რატომ BPN Georgia? 

როცა  ონლაინ სივრცეში შემთხვევით აღმოჩენილი ტრენინგი გავიარე BPN Georgia-ში – ,,ჩემი ბიზნეს გეგმა – წარმატების გასაღები’’, ზუსტად მაშინ მივხვდი რამდენი შესაძლებლობა არსებობს, რამდენი შანსები გვეძლევა. მივხვდი რომ ამ კომპანიას შეეძლო ჩემს გვერდით დგომა და მხარდაჭერა, შეეძლო ყოფილიყო ის, ვინც გეიმედება და ბიზნეს სამყაროს ქაოსში შეუძლია აზრები დაგილაგოს და საუკეთესო მიმართულება აგარჩევინოს, ამიტომაც გადავწყვიტე გავმხდარიყავი ამ კომპანიის მიერ შექმნილი ოჯახის წევრი.

BPN Georgia რომ პიროვნება ყოფილიყო, როგორი იქნებოდა ის? 
საუკეთესო ბიზნეს მეგობარია, დიდი გამოცდილებით, დაუზარელი მრჩეველი, საქმის პროფესიონალი და რაც მთავარია, მოტივატორი.

თქვენი გამოცდილების გათვალისწინებით რას  ურჩევდით მეწარმეებს?
ახალ წამოწყებებს არ შეუშინდეთ, არ გაჩერდეთ, არ მოხვდეთ სხვისი აზრების გავლენის ქვეშ, აღმოაჩინეთ, შეინარჩუნეთ და განავითარეთ თქვენი უნიკალურობა. დარწმუნებული იყავით იმაში, რასაც აკეთებთ და აუცილებლად გადასდებთ ამას სხვებსაც, რაც განვითარების გზაზე უფრო და უფრო წინ წაგიყვანთ.

როგორ ფიქრობთ, მომხმარებელია მეფე, თუ თქვენ? 
მეფობა დიდი ტვირთია, მეფობისთვის ცოდო ვარ მეც და მგონია, რომ მომხმარებელიც

წარსული, აწმყო თუ მომავალი? 

წარსული არის ის, რამაც აწმყომდე მოგიყვანა, პატივსაცემია და დასაფასებელი ყველა ის გამოცდილება, კარგიც და ცუდიც, რამაც გაქცია იმ პიროვნებად რაც დღეს ხარ, ხოლო აწმყო არის ის შანსი, რამაც უნდა გაქციოს უკეთეს ადამიანად, ვინც მომავალში გახდები.

The post ჩემი ბიზნესის ისტორია – ნინო დევაძე appeared first on BPN Georgia.

The post ჩემი ბიზნესის ისტორია – ნინო დევაძე appeared first on BPN Georgia.

გარდა იმისა, რომ ხართ მეწარმე, კიდევ რას გვეტყოდით თქვენზე?

რა შემიძლია ვთქვა ჩემს შესახებ? დავამთავრე ი. ჯავახიშვილის სახელობის სახელმწიფო უნივერსიტეტის ეკონომიკის ფაკულტეტი. მაქვს ბუღალტრად მუშაობის 16 წლიანი გამოცდილება, ახლაც ჩემს ბიზნესთან ერთად, პარალელურად, აუთსორსზე ვემსახურები რამოდენიმე კომპანიას. მყავს ორი შვილი და ვარ ორი უსაყვარლესი პატარას ბებია.

რატომ ეს ბიზნესი? 
ყოველთვის მიყვარდა სამზარეულოში ფუსფუსი, ახლაც სიამოვნებით ვამზადებ. მომწონს ტრადიციული რეცეპტები, მაგრამ ამავდროულად ვცდილობ არ ჩამოვრჩე სიახლეებს კულინარიასა და კონდიტერიაში. ყოველთვის მინდოდა რაღაც ჩემი პატარა საქმე მქონოდა, საქმე, რომლის კეთება სიამოვნებას მომანიჭებდა. ალბათ დამეთანხმებით, რომ შოკოლადი სწორედ ის არის, რაც ადამიანების უმრავლესობას ბედნიერებას ანიჭებს. ვფიქრობ, სწორი არჩევანი გავაკეთე, რადგან შოკოლადთან მუშაობა მართლაც უდიდესი სიამოვნებაა. ეს არის საქმე, რომელიც საშუალებას მაძლევს განვვითარდე, ვისწავლო და ვიმუშაო საკუთარ შესაძლებლობებზე.

მთავარი სარგებელი, რომელსაც თქვენი პროდუქტი/სერვისი აძლევს მომხმარებელს?
დღეს სამომხმარებლო ბაზარი მდიდარია მრავალფეროვანი შოკოლადის ნაწარმით, ასევე დიდია ხელნაკეთი შოკოლადის ბაზარიც. ჩოკომია მომხმარებელს ვიზუალური და გემოვნური თვისებებით განსხვავებულ პროდუქტს ვთავაზობ. შოკოლადის ტრიუფელების მრავალფეროვანი არჩევანი შესაძლებლობას იძლევა ყველა გემოვნების ადამიანი დააკმაყოფილოს. რაც შეეხება ყველიანი შოკოლადის ტრიუფელებს,  ეს არის განსხვავებული და ორიგინალური საჩუქარი, რომელიც გულგრილს არავის ტოვებს.

რაში მდგომარეობს თქვენთვის ბიზნესის წარმატების  ფორმულა? 
ბიზნესის წარმატების ფორმულა იმ საქმის სიყვარულია, რომელსაც აკეთებ. სიახლეებისადმი მზაობა, სურვილი გაიღრმავო ცოდნა, მიიღო გამოცდილება. და მაინც, ვთვლი, რომ მთავარი დაუღალავი შრომაა.

ყველაზე დიდი გამოწვევა, რომელიც აქციეთ შანსად? რა გასწავლათ ამ კონკრეტულმა შემთხვევამ?

ყველაზე დიდი გამოწვევა იყო შემთხვევითობა (თუმცა შემთხვევით არაფერი ხდება), ეს იყო ინფორმაცია შოკოლადის წარმოების შემსწავლელი ონლაინ კურსის შესახებ, რომელმაც ჩემი დიდი ინტერესი გამოიწვია. გავიარე კურსი და მივხვდი, რომ ეს საქმე უნდა მეკეთებინა, რომ სწორედ შოკოლადთან უნდა დამეკავშირებინა ჩემი შემდგომი საქმიანობა. მიუხედავად იმისა, რომ ჩემს ძირითად საქმიანობას ბევრი დრო და ენერგია მიჰქონდა,  არ მქონდა საკმარისი ფინანსები ახალი საქმის წამოწყებისთვის, არ ვიცოდი ბიზნესის მართვა, არ მქონდა გამოცდილება სოციალური მედიის მართვასა და რეკლამირებაში, მაინც მივიღე გადაწყვეტილება – მეცადა.
და არც შევმცდარვარ! მთავარია სურვილი, საქმის სიყვარული.
იმ დროის მანძილზე, რაც ჩემს საყვარელ საქმეს ვაკეთებ, მივხვდი, რომ არასდროს არ უნდა თქვა უარი ახალ გამოწვევასა და ოცნებაზე. სამყარო ჩვენს გარშემო მხოლოდ ჩვენი სურვილების ასრულებისთვის მუშაობს – რასაც მთელი გულით ვისურვებთ, ყველაფერი აგვისრულდება.

რა  გაძლევთ ძალასა და ენერგიას თქვენი ყოველდღიური საქმიანობისთვის? 

ძალასა და ენერგიას ჩემი კმაყოფილი მომხმარებლების გამოხმაურება მაძლევს. საოცარ ენერგიას ვიღებ, როცა ყველიანი შოკოლადის ხსენებაზე მათ სახეზე უსაზღვრო გაოცება გამოიხატება და კიდევ უფრო მეტად ვრწმუნდები ჩემი საქმის წარმატებაში, როცა დაგემოვნების შემდეგ დაუვიწყარ შთაბეჭდილებას იღებენ.

მთავარი მიზეზი რატომ BPN Georgia?  

მთავარი მიზეზი მათი პროფესიონალიზმია. BPN Georgia-ს გუნდი მხარში უდგას მეწარმეს, უზიარებს ქართველი და უცხოელი ექსპერტების გამოცდილებას. ჩემზე დიდი შთაბეჭდილება მოახდინა ინდივიდუალურმა კონსულტაციებმა, სადაც ისეთი საკითხები განვიხილეთ და ისეთ ნიუანსებს შევეხეთ, რასაც ვერც კი წარმოვიდგენდი. სწორედ ეს არის ამ უძლიერესი გუნდის ყველაზე დიდი დადებითი მხარე.

BPN Georgia რომ პიროვნება ყოფილიყო, როგორი იქნებოდა ის?

რა საინტერესო კითხვაა… მეგობრული, მოსიყვარულე, თბილი, მხიარული, ჭკვიანი, ერთგული, კომუნიკაბელური. ალბათ გამიჭირდება ყველა თვისების ჩამოთვლა. BPN Georgia  რომ ადამიანი იყოს, ის იქნებოდა საუკეთესო მეგობარი, რომელიც ყოველთვის მზადაა დახმარების ხელი გამოგიწოდოს.

თქვენი გამოცდილების გათვალისწინებით რას  ურჩევდით მეწარმეებს? 
ბიზნესში საჭიროა თავდადება, საქმის სიყვარული, მზაობა სწავლისთვის, განვითარებისთვის. საჭიროა ბიზნეს გეგმის შედგენის ცოდნა, დაგეგმვა, მომავლის გათვლა, ანალიზის უნარი.

როგორ ფიქრობთ, მომხმარებელია მეფე, თუ თქვენ?
დამკვიდრებული გამოთქმა – „მომხმარებელი ყოველთვის მართალია“ – ბიზნესის მფლობელისთვის სახელმძღვანელო უნდა იყოს. თუმცა ყოველთვის საჭიროა დადგინდეს ზღვარი გონივრულ ფარგლებში. მეფე მომხმარებელმა უნდა იცოდეს, რომ როცა ჩემს სამეფოშია, ისევე როგორც ყველგან, აქაც მოქმედებს გარკვეული ქცევის ნორმები, რომლებიც უნდა გაითვალისწინოს.

წარსული, აწმყო თუ მომავალი?  

რომ არა წარსული, აწმყო არ იქნებოდა. წარსულში მიღებული ცოდნა – გამოცდილება აწმყოში უნდა გავაღრმავოთ და დავხვეწოთ, რათა მივიღოთ ის მომავალი, რომელიც გვინდა.

The post ჩემი ბიზნესის ისტორია – მაია რატიანი appeared first on BPN Georgia.

The post ჩემი ბიზნესის ისტორია – მაია რატიანი appeared first on BPN Georgia.