შეხვედრა მეწარმეებთან – ელისო ხარჩილავა Green Art Georgia – ს დამფუძნებელი

BPN Georgia მცირე და საშუალო ბიზნესის ხელშეწყობის პროგრამის ფარგლებში აგრძელებს ქართველ მეწარმეებთან შეხვედრას.
ამჯერად  ლანდშაფტის დიზაინერს, კომპანია Green Art Georgia-ს დამფუძნებელსა და მმართველს, ელისო ხარჩილავას ვესტუმრეთ. ადგილზე გავეცანით იმ მიმდინარე პროექტებს, რომლებსაც კომპანია ამჟამად ახორციელებს. Green Art Georgia უკვე 4 წელიწადზე მეტია მომხმარებელს გამწვანება-დაგეგმარების სრულ სერვისს სთავაზობს, ლანდშაფტური პროექტის შექმნიდან დაწყებული, წყლის სისტემის მონტაჟით დასრულებული. კომპანია მაქსიმალურად ორიენტირებულია დამკვეთის საჭიროებაზე, მის გემოვნებასა და სურვილებზე და წლების მანძილზე დაგროვილი ცოდნა-გამოცდილების დახმარებით ახერხებს, ყოველ ჯერზე შექმნას ექსკლუზიური პროექტი, რომელიც მომხმარებლის როგორც ესთეტიკურ, ისე ფუნქციონალურ მოთხოვნილებებს აკმაყოფილებს.
Green Art Georgia დაინტერესებულ ნებისმიერ მსურველს ლანდშაფტის დიზაინის შემსწავლელ მოკლევადიან კურსებსაც სთავაზობს, სადაც ქ-ნი ელისო საავტორო კურსის ფარგლებში საკუთარ  დიდ თეორიულ და პრაქტიკულ ცოდნა-გამოცდილებას უზიარებს მსმენელებს  და ამ გზითაც ცდილობს რაც შეიძლება მეტ ადამიანს მისცეს შესაძლებლობა, თავადვე შეძლონ საკუთარი კარ-მიდამოს, ბაღის, აივნის თუ ვერანდის გამწვანება, მისი სამოთხედ გადაქცევა.
ქოუჩინგის ფარგლებში განხილულ იქნა  Green Art Georgia-სთვის აქტუალური საკითხები, განვითარების ის გრძელვადიანი გეგმა, რომელსაც თანმიმდევრულად მიჰყვება კომპანიის ხელმძღვანელი. BPN Georgia-ს შვეიცარიელ წარმომადგენელთან ერთად ელისომ კიდევ ერთხელ ისაუბრა კომპანიის შეთავაზებაში არსებულ სერვისებზე და იმაზე, თუ რომელი მათგანია უპირატესი, საუბარი შეეხო ასევე Green Art Georgia-ს მომხმარებლებს, ფოკუს ჯგუფს და იმას, თუ რა მარკეტინგული ღონისძიებებია დაგეგმილი, რათა კიდევ უფრო გაფართოვდეს ეს ჯგუფი და კიდევ უფრო მეტ პოტენციურ მომხმარებელს მიაწვდინოს ხმა კომპანიამ.
BPN Georgia  წარმატებებს უსურვებს Green Art Georgia-ს!