Skip to content 
აუღებელი ციხესიმაგრე აღებულია!
დეა თავბერიძე 2018 წლის ოქტომბერში გავიცანით BPN Georgia – ს მიერ ორგანიზებულ ტრენინგზე თემით ბიზნეს გეგმის შედგენა და მარტივი ფინანსური დაგეგმარება. პირველივე შეხვედრისას მან თავი გამოიჩინა როგორც აქტიურმა და სწავლას მოწყურებულმა მონაწილემ, რომელიც ყველაფერს რვეულში ინიშნავდა. მისი მორიგი ვიზიტისას ბიზნესის ადმინისტრირების და მარკეტინგის სემინარზე ჩვენი გზები ისევ გადაიკვეთა. საკუთარი პრეზენტაციით დეამ ნათელი წარმოდგენა შეგვიქმნა მის ბიზნეს საქმიანობაზე, რომელიც გულისხმობს სამოტივაციო ინტერნეტ ჟურნალის www.jolo.ge მართვას.
დეამ მოსალოდნელზე დიდი დრო მოანდომა ბიზნესის გაფართოების მიზნით ბიზნეს გეგმის შედგენას, რომელშიც ის ტურიზმის და ფსიქოლოგიური ტრენინგების გადაკვეთის წერტილის მონახვას ცდილობდა.
«მე მთელი ენერგია უნდა მომეკრიბა, რომ თითქმის აუღებელ ციხესიმაგრედ წარმოდგენილი «ბიზნეს გეგმა» დამეწერა BPN Georgia-ს დახმარებით. პირველივე კედლის გარღვევის შემდეგ მთლიანად გადავეშვი გეგმის წერის პროცესში, რომლის დროსაც უამრავი განვითარებაზე ორიენტირებული იდეა დაიბადა. ისეც ხდებოდა, რომ იდეები არ მაძინებდა და დილის 5 საათზე ვდგებოდი, რომ ისინი ფურცელზე გადამეტანა. ბიზნეს გეგმაზე მუშაობამ შინაგანი მოტივაცია გამიღვივა საკუთარი გეგმების განსახორციელებლად და ბიზნესის პროფესიონალურ დონეზე ჩამოსაყალიბებლად»
დეა ამაოდ არ გარჯილა. ჟიურის გადაწყვეტილებით მისმა ბიზნეს გეგმამ გაიმარჯვა BPN Georgia-ს 2020 წლის შესარჩევ კონკურსზე.
დეამ ჟიური აღაფრთოვანა ორგანიზებული ბიზნეს იდეებით, მათი განხორციელების ზუსტი გეგმით, ბიზნესის განვითარების ნათელი ხედვით და შანსების და რისკების ანალიზით.
ვულოცავთ მას ამ წარმატებას!
ჩვენ კი მოხარული ვართ დეასთან შემდგომი თანამშრომლობის პერსპექტივით და სხვა დაუძლეველი ციხესიმაგრეების აღების მოლოდინით.
