შეხვედრა მეწარმეებთან – ნათია სხვიტარიძე FAS Group – ის დამფუძნებელი

ნებისმიერი ბიზნესისთვის საერთაშორისო პრაქტიკის გაზიარება ყოველთვის მამოტივირებელ ფაქტორს წარმოადგენს, განსაკუთრებით კი მაშინ, როცა კომპანიას საქმიანობა ახალი დაწყებული აქვს.

კომპეტენტური ადამიანის რჩევები საშუალებას გვაძლევს კომპანიის პრობლემები თუ შესაძლებლობები უფრო ფართო ჭრილში დავინახოთ და მომავალიც უკეთ დავგეგმოთ.

BPN Georgia-ს პროგრამის ერთ-ერთი წარმატებული მონაწილე სრული ბუღალტრული და აუდიტორული მომსახურების კომპანია FAS Group-ია, რომელმაც საქმიანობა არც თუ ისე დიდი ხნის წინ დაიწყო. თუმცა, ბაზარზე საკუთარი ადგილი უკვე დაიმკვიდრა, როგორც ხარისხსა და მომხმარებელთა საჭიროებებზე ორიენტირებულმა კომპანიამ.

FAS Group-ის დამფუძნებელი ნათია სხვიტარიძე ყოველთვის ცდილობს აქტიურ კომუნიკაციაში იყოს საკუთარი სფეროს, როგორც ადგილობრივ, ისე საერთაშორისო ექსპერტებთან. მას კარგად აქვს გაცნობიერებული, რომ კომპანიის წარმატების დიდი წილი საჭირო კავშირებზე, ნეთვორქინგზე, წამყვანი კომპანიების გამოცდილების გაზიარებაზე მოდის.

სწორედ ამ მიზნით BPN Georgia-ს ორგანიზებით BDO-შვეიცარიის დირექტორ ვერნერ შისერსა და ნათია სხვიტარიძეს შორის შედგა ონლაინ ბიზნეს კონსულტაცია, სადაც ექსპერტმა საკუთარი დიდი გამოცდილება გაუზიარა BPN Georgia-ს პროგრამის მონაწილეს.

შეხვედრის ფარგლებში მრავალი მნიშნველოვანი საკითხი იქნა განხილული და ხაზი გაესვა იმ ძირეულ გამოწვევებს, რომლებიც საქართველოში ხელის შემშლელ ფაქტორებს წარმოადგენს ბუღალტრული და აუდიტორული მომსახურების კომპანიებისთვის. აღინიშნა, რომ ზოგადად კვალიფიციური კადრების ნაკლებობა ერთ-ერთი საკვანძო თემაა. თუმცა FAS Group-ი ამ პრობლემას იმით უმკლავდება, რომ კურსის ფარგლებში, რომელსაც ის დაინტერესებულ პირებს სთავაზობს, საკუთარი კადრების გადამზადებასაც ახდენს, რაც ზრდის კომპანიის რეპუტაციას და აძლევს მას საშუალებას მის მიერ გაწეული მომსახურების ხარისხი იყოს მუდმივად მაღალი.

საუბრის თემას, ასევე შეადგენდა კომპანიის რისკებისა და ხარისხის კრიტერიუმების ანალიზი, თანამშრომელთა წახალისების საკითხები, საერთაშორისო ბაზარზე გასვლასთან დაკავშირებული შესაძლებლობები და გამოწვევები.

BPN Georgia წარმატებებს უსურვებს FAS Group-ს!

თუ თქვენც გსურთ გახდეთ BPN Georgia-ს პროგრამის მონაწილე დარეგისტრირდით ბმულზე,  ან დაგვიკავშირდით ნომერზე 599 87 93 41.