მცირე ბიუჯეტის პირობებში უპირველეს ყოვლისა ვსაზღვრავთ რეკლამის ზუსტ სამიზნეს. ვისზე მიგვაქვს იერიში? ვისი გული უნდა მოვიგოთ ჩვენი პროდუქტის გაყიდვები რომ დაიძრას? ეს არის პირველი, რითაც ვიწყებთ.
სტარტაპერი ხშირად ერთსა და იმავე შეცდომას უშვებს: მთელი აქცენტი მომხმარებელზე გადააქვს და მასთან პირდაპირი კომუნიკაციის დამყარებას ცდილობს. ეს ძალიან შრომატევადი გზაა, მცირე ბიზნესს საამისოდ შეიძლება რესურსი არ ეყოს. გაცილებით ადვილია იპოვო შუამავალი, გამყიდველი, ბითუმად მოვაჭრე, ან მარკეტინგული ჯგუფი - მოკლედ ის, ვინც შენს პროდუქტს მომხმარებლამდე მიიტანს.
მეორე კითხვა კომუნიკაციის არხს ეხება. როგორ დავუკავშირდე ჩემს სამიზნეს? როგორი უნდა იყოს პრეზენტაცია? შემიძლია თუ არა შევქმნა გარემო ჩემი პროდუქტის უპირატესობების წარმოსაჩენად? კომუნიკაციის ელექტრონული არხები ადვილად ხელმისაწვდომია, ამიტომ მათ ყველა იყენებს. ეცადეთ პრეზენტაცია გამორჩეული გქონდეთ. საინტერესო არა მხოლოდ პროდუქტი უნდა იყოს, არამედ მისი წარდგენის გზებიც. სწორი წარდგენა ხდის შეთავაზებას მიმზიდველს და დამაჯერებელს.
როგორ მიდის შენი შეთავაზება მომხმარებლამდე? *
სტარტაპ On-ის შემთხვევაში, რომელიც ინოვაციურ სარბენ ფეხსაცმელს ქმნის, თავიდანვე ცნობილი იყო, რომ პროდუქტის რეალიზაცია ამ ბაზარზე სპორტული მაღაზიების საშუალებით ხდება. ანუ, არა საბოლოო მომხმარებლის, არამედ სპორტული პროდუქციით მოვაჭრეთა გულის მოგება არის გადამწყვეტი, რათა ფეხსაცმელმა საერთოდ მიაღწიოს დახლამდე. მალევე გაირკვა, რომ სატელეფონო ზარებით, ან თუნდაც კვალიფიციური რეკომენდაციებით (კომპანიის ერთ-ერთი დამფუძნებელი ყოფილი სპორტსმენია) არაფერი გამოვიდოდა. სავაჭრო ქსელები თავად უნდა დარწმუნებულიყვნენ, რომ პროდუქტი განსაკუთრებულია, ამის მიღწევა კი არც ისე იოლი იყო. სტარტაპერები იძულებული გახდნენ, ამ შუალედური რგოლის მოთხოვნილებები კარგად შეესწავლათ. საბოლოოდ პროდუქტის პრეზენტაცია ერთობლივი რბენის ფორმატში გადაწყდა. On-ის დამფუძნებელი ქალაქის საუკეთესო სპორტული მაღაზიის მოვაჭრეს ერთად სირბილზე შეუთანხმდა, დათქმულ შეხვედრაზე კი საკუთარი წარმოების სხვადასხვა ზომის სპორტული ფეხსაცმელებით მივიდა. ცხადია, მორბენალს მათი გამოცდა უფასოდ შეეძლო.
შედეგი: მოვაჭრე მოიხიბლა სირბილით მიღებული ახლებური განცდით და გარიგება შედგა. ასე „ჩაურბინა“ ფირმა On-მა კონკურენტებს და მაღაზიების თაროებზე განთავსდა.
გამოიყენეთ ინტერნეტ რესურსები, სოციალური მედია, ონლაინ პლატფორმები, მცირე ბიზნესისთვის ისინი უნიკალურ შესაძლებლობებს ქმნიან. ამავდროულად გახსოვდეთ, რომ პროდუქტის შეძენის გადაწყვეტილებას მომხმარებელი ემოციებზე დაყრდნობით იღებს. არა აქვს მნიშვნელობა, B2B პროდუქტს ქმნით, თუ B2C მომსახურებას, შუამავალს უმიზნებთ, თუ საბოლოო მომხმარებელს, ნებისმიერი რაციონალური გადაწყვეტილების უკან დგას ადამიანი, რომლის გულს ფიზიკური განცდით უფრო ადვილად მოიგებთ, ვიდრე ვირტუალურით. კომპანია On-ის მაგალითი, რომელიც 2010 წელს დაფუძნდა და დღეს უკვე ორასზე მეტ თანამშრომელს ასაქმებს, ამის ნათელი დასტურია.
* ქეისი მოწოდებულია BPN Georgia-სა და სენტ გალენის უნივერსიტეტს შორის მიმდინარე თანამშრომლობის ფარგლებში. წყარო: სტარტაპ ნავიგატორი
